雷深如 J.Arie 開live 難忘柏斯帶入行


雷深如 J.Arie 近日感激有大大小小嘅品牌搵我做自彈自唱嘅live show,當中最難忘嘅一定係柏斯琴行同Casio搞嘅show, 因為其實J.Arie因為呢間琴行而入行嘅。

話說我嗰時中六,我喺暪住屋企人嘅情況下,參加過唯一一次公開歌唱比賽,就係呢間琴行搞嘅。我初賽一下就俾人叮走左,但係竟然有初賽嘅評判搵我開始幫佢唱demo,由嗰度開始,我就認識到唔同嘅監製,再有機會去夾band唱唔同嘅商場、婚禮、Band show。唱咗大概四五年之後,有監製問我畢咗業第一份工想唔想做歌手,讀左咁耐書,我梗係二話不說就應承左先啦哈哈!所以可以返返去呢個琴行唱歌,真係我一個好大嘅情意結!
另外,有聽眾喺度聽緊我唱Live嘅時候留言,話想聽古天樂嘅《男朋友》,我係超驚訝點解聽眾會記得呢隻歌係同我有啲關連!
話說前一兩年嘅電影工作者春茗,我同小肥、王梓軒等等幾個歌手同音樂人上台表演金像獎嘅歌。古生係演藝人協會會長,我哋諗住喺台上特別鳴謝佢,所以唱咗佢首名曲《男朋友》,嗰時應該仲未有人夠膽係佢面前唱呢隻歌,佢亦都應該已經好多年冇公開唱過歌。
其實我哋嗰刻都有啲驚佢會嬲㗎,但係古生竟然喺我哋唱到中段嘅時候,上左台同我地一齊大合唱,即刻全場超哄動!因為果次真係古生真真正正第一次開金口!同埋我哋真係手勢跪拜佢,真心尊敬佢陪我地打成一片咁玩!事後亦都有唔少人話我地真係好夠膽,但係而家你睇吓,自此之後, 古生都有間唔時再開下金口唱歌!但係果次嘅大膽舉動都可謂係我哋最美好同埋最搞笑嘅回憶!

浩楠

Stars-hk 創辦人, 希望建立一個只談專業, 不談八卦的娛樂資訊網站。