黎姿捧古惑仔場伊健眼濕濕(附圖輯)

一連四場《歲月友情演唱會》前晚紅館圓滿成功,五位古惑仔鄭伊健、陳小春、林曉峰、謝天華及錢嘉樂兩度安哥出場。合唱《友情歲月》時,林曉峰,錢嘉樂和謝天華high到台上除衫,大騷修身肌肉,伊健亦拉開外套拉鏈,六舊腹肌,小春被笑指吝嗇身材。前晚台下觀眾席亦星光熠熠,佘詩曼、苗喬偉、戚美珍、劉浩龍、蘇永康、周麗淇、鄭希怡、洪天明夫婦、李燦琛、鄭欣宜及樂易玲等,還有各位阿嫂「伊健嫂」蒙嘉慧、「嘉樂嫂」湯盈盈、「小春嫂」應采兒及「天華嫂」Tina等,擔任和音的「曉峰嫂」康子妮就坐在樂隊席,其家人亦拉隊捧場。

 

萬眾期待的「細細粒」黎姿現身捧場,全場哄動,她與四位阿嫂齊齊坐在『主家席』,觀眾爭相拍照還大叫她「細細粒」。演唱會期間,穿著高跟鞋的黎姿還不時站起來,跟台上的古惑仔互動揮手和拍掌,非常投入。在安歌時,五位古惑仔齊聲多謝席上的黎姿。錢嘉樂拉着伊健行前說:「伊健咁緊張,係因為太耐無見『細細粒』。」伊健向著觀眾席上的黎姿說:「我哋由電影認識,我第一次演唱會都係你做嘉賓,第一次喺上海開騷,又是你來救駕,做我嘉賓!小弟年青時唔識講感激說話,我真心多謝你!多謝你來臨!」雖然伊健講的時候帶著笑容,但其實他眼濕濕,他還輕輕抹去眼角淚水,而台下的黎姿點頭示意,她身旁的蒙嘉慧亦一臉感動。

 

之後五子大爆當年拍《古惑仔》電影系列時趣事,期間講到小春和伊健在戲中打交的一幕,林曉峰說:「由於戲裏有既小春『叫雞』。。。」錢嘉樂加把口附和,然後齊齊望住觀眾席的「小春嫂」應采兒,眾人七嘴八舌扮作為小春解畫,小春黑臉,林曉峰打圓場笑說:「佢太太明事理既。。。。不過返去就死梗!」全場爆笑。林曉峰又指當年在澳門橋拍斬人戲時幾乎被車撞倒,幸得謝天華一手拉住,救他一命,種種事情建立了他們的兄弟情。之後他讀出康子妮的微博留言,令太太感動落淚。而唱冧歌氹老婆的環節,錢嘉樂自彈自唱《同一秒》時,表示要送給另一半湯盈盈及二奶(女兒)錢凱晴,此時盈盈抱住愛女現身觀眾席,閃光燈勁閃,小凱晴有備以來,她戴住黑超及耳筒,一張小臉肥嘟嘟,超級可愛!

 

慶功宴上,五子開香檳又切蛋糕慶祝,表現興奮!訪問時,陳小春被追問是否介意台上被取笑「叫雞」?他解釋:「現場有好多小朋友,呢啲字眼唔好囉!」錢嘉樂即笑說:「咁我哋Part II唔講, 改為講『去滾』啦!」伊健卻繼續開玩笑道:「聽日報道既標題係:陳小春叫雞!」問小春是否惜肉如金不除衫?伊健踢爆:「無操練!」錢嘉樂維護說:「但佢操體能,練氣,練歌!」小春自辯:「我第一天已經講明,唔係做鴨,點解要除衫?!」錢嘉樂問:「你話我哋?」小春答:「唔係!綵排時又沒排過,點知你們除!(尷尬?)我點會?!」伊健笑指是老婆應采兒不准小春除,錢嘉樂和議:「太太惡晒!」

 

提到伊健向黎姿致謝時眼濕濕,他說:「太耐無見!佢有情有義,其實可以唔嚟架,但佢睇足全場。(你打電話請佢?)唔係,其實今次係林曉峰先傳短訊畀佢,然後我太太再約佢食飯,最後佢就嚟咗!」演唱會上五子大唱情歌冧老婆,小春說:「佢哋喺個騷度被變成表演者,返屋企仲要照顧小朋友,很辛苦架!」演唱會開Part II?天華說:「要睇觀眾反應啦!」