何展睿攜學生聖誕送暖 盼明年重啓巡唱

唱作歌手何展睿(Steve)近期為新歌《套戲未做完》到各大平台宣傳外，聖誕亦落力出席酒店演出。他攜同音樂學校學生以弦樂合奏多首聖誕金曲及演唱自己作品《逆光》、《幸福的情歌》，盼師生一起以音樂送暖。他表示：「對上一次同學生一齊表演已經係2019年！上年受疫情影響，所有演出都被迫取消，呢幾日係今年第一個實體表演，佢哋好興奮，我就好滿足，因為實體演出可以感受現場反應同氣氛！」

 

講到近期發生開心事：「聖誕期間自己第一隻處男創作專輯《愛情六重奏》會係各音樂平台上架，雖然隻碟係上年發行，但主要內銷無公開發售，而且全部售罄，加上有好多新粉絲想再次欣賞，所以就當一份聖誕禮物送比大家！」。此外，他近期亦開心努力重整自己生活：「記得有個訪問要我推介一本書，我就介紹一本有關丹麥人生活既書，因為丹麥被譽為全世界最幸福國家，當中令我反思自己生活：比多啲時間自己休息，唔好一味向前衝，好好重新佈置生活環境，改變一下生活習慣。」

回顧2021年，Steve表示：「好滿意今年完成既工作：開咗第一個音樂會、出咗一首全新風格音樂作品《套戲未做完》、MV又挑戰反串做女人、音樂中心舉行十周年音樂會、第一次參加電視台台慶、落區同粉絲一齊派防疫物資、仲同太太一齊參加市集，好多新體驗！」

最後，他表示希望明年能夠重啓巡唱：「我出道開始就發動巡唱，同學生、粉絲一齊去學校、老人院、甚至落區，藉著分享音樂、自身拼博故事為大家發放正能量。我覺得好有意義，比學生知道學音樂唔單只為咗考証書，音樂都可以為大家帶嚟歡樂！見近期疫情有改善，所以希望明年可以全力重啓巡唱，去更多地方分享！」