港姐賴彥妤牛一扮靚靚 開心成立官方後援會


參選《2021香港小姐競選》的「英國學霸」賴彥妤(Vivienna)一直狀態大勇並不停增值自己同變靚啲。雖然喺決賽前止步,但透過早前《We Miss Hong Kong STAY-cation晉級賽》的真人騷出街後盡得人緣。出街有人認得,叫佢繼續加油之外,買杯果汁都有阿姐請佢食串魚蛋。

而最令Vivienna驚喜就係有忠粉由面試Day 1一直支持佢參選港姐嘅全過程,截圖製作咗個影片特輯送比佢,並為佢成立咗個官方後援會,招收忠粉一齊支持自己。Vivienna話:「覺得好Surprise,佢哋嘅舉動好warm。出活動嘅時候又幫我做埋保安咁,買埋Lunch Set比我驚我餓親。即刻好似突然多咗十幾個男朋友咁,佢哋係好sweet。」

Vivienna更喺社交平台上載喺自己牛一前夕相約好友形象指導許嘉浩(Karl Hui)去醫學美容中心扮靚嘅相,表示同對方相識多年,感謝佢一直鼓勵同支持令自己內外都變得更美。Karl仲為壽星女出發生日Party前為佢大變身,化身仙氣十足嘅「選美冠軍」Look出發同一班姊妹慶祝,象徴佢係大家心目中嘅冠軍。

而不斷增值自己嘅Vivienna話自己貪靚,參選時好多時都要幫自己化妝同管理好皮膚狀態,所以最近跟醫美醫生學做美容管理,樂做「醫美小助手」。Vivienna仲好識做咁回禮比Karl,幫佢做番個補水十足嘅Treatment,好似幫閨蜜扮靚咁。講到踏入27歲生日之後又大一歲有咩新方向? 佢話自己暫時把握時間報讀演藝課程學緊方法演技,其他等TVB安排。都希望拍劇,又話最近見到港姐師姐謝嘉怡加入《愛回家》劇組表示好羨慕,好想有機會參與拍劇入屋令觀眾記得自己。甚至同自己斯文形象反差大啲嘅角色或者打女都唔怕辛苦,話自己真係好捱得架。

浩楠

Stars-hk 創辦人, 希望建立一個只談專業, 不談八卦的娛樂資訊網站。