雷深如深造音樂望創作更多好作品


雷深如 J.Arie 說:真係冇諗過上年寫俾黃淑蔓嘅”Dream my Dreams”可以拎到903叱吒頒獎典禮專業推介十大嘅第4位!好感激自己寫嘅曲被採用,黃淑蔓亦係一個將首歌演繹昇華嘅好歌手,所以希望同佢合作唔止一次啦!

寫曲當然就係希望靈感不斷,就算唔係不斷都希望可以隨心而寫,唔好只係為咗計算同埋市場而做,咁樣做完出嚟都唔會開心同埋冇咩意義。所以最近我以幕後作曲人身份join咗一個為期一年嘅深造音樂計劃,可以配對唔同嘅音樂人一齊合作造歌。我係超級期待,因為會有機會遇到我從來冇合作過嘅監製或者編曲人,今次合作得好可能會變成長期合作嘅夥伴㗎!

今年我希望將所有時間同精神俾音樂,用心寫更多歌俾人。自己如果有機會出歌嘅話,希望可以同多啲歌手朋友合作。早前有幸被選為新一屆演藝人協會嘅幹事,會長當然係古天樂先生啦。見到佢上年都有同其他歌手喺歌曲上嘅合作,如果有機會寫歌俾佢,而佢又要我嘅曲就好啦!

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。