陳小春初行catwalk 為杜德偉時裝show完滿壓場

杜德偉（Alex）昨晩在（28/5)在杭州順利舉行首個自家品牌創作MNA時裝show，Alex眼光獨到，找來好友陳小春為時裝show壓軸出場，掀起整晚的高潮，所有嘉賓都舉機拍照狂歡，令時裝show成功演出。

第一次行catwalk的小春，完show後接受訪問：「我仲流緊汗，行之前唔知自己要望邊到，最後唔諗啦，昂然大步挺胸行就算啦！好彩有音樂，如果冇音樂，真係騰呀！行完幾分鐘catwalk，好似唱完半個鐘頭演唱會咁！」Alex馬上反問：「係唔係呀？」小春說：「真係！唔係講笑！我picture唔到個畫面係點，如果台下冇人有反應咁點算呢？又驚有肚腩又驚條褲會甩⋯⋯」

Alex回應：「我啲衫點會呢？小春又咁fit！真係好多謝小春，因為獻出第一次，但佢完全駕馭到套衫，佢一行出場全場哄動，有小春成個show真係生色不少！」而其他好友志偉、B哥則投訴：「點解靜係叫小春，唔叫我哋行呀？」Alex說：「下次要要幫曾志偉設計衣服，揀套短度闊風比佢！」Alex再問小春，下次是否願意再幫手行show，小春爽快回答：「冇問題！」Alex說：「朋友就係咁樣啦！」

Alex創立了10年的時裝品牌MNA，今次重新啟動MNA，找來日本設計造型師Norio Sato合作，兩人一拍即合，順利完成首季時裝show。事後Alex也特別感謝兩位好友美國舞者Jabari Timmons及吉他手劉吉寧演出，為MNA時裝秀打響頭炮。多位好友包括梁家輝夫婦、曾志偉、陳小春、鍾鎮濤（B哥）夫婦、葉童夫婦、上山詩鈉、巫啟賢等現身支持，場面星光熠熠。一班好友看得非常投入，搖滾之友梁家輝及B哥邊聽著由Alex挑選的音樂，一邊打拍子；葉童不時拿出手機拍下時裝，而志偉更鬼馬地解說：「MNA，即係Man and Animal！」完show後，Alex與一班好友舉行after party慶功，舉杯暢飲！

MNA即「Mute Nostril Agony」，源自60年代末美國流行樂隊The Doors靈魂人物Jim Mor-rison的早期詩作Horse-Latitudes。詩中講述為了躲避海上的風浪，運貨的馬匹被船員推進大海後屏息靜等的掙扎。從這個滿含悲情色彩的故事中，杜德偉感受到了一顆「不死之心」，渴望自由與重生的態度造就了他的設計初心。