《娛樂後援會》張建聲直認想打鑊王宗堯

張建聲（Justin）到茜利妹及邵子風主持的節目《娛樂後援會》受訪，談到初出道時拍攝三級片《蜜桃成熟時33D》（加藤鷹及吉澤明步主演），邵子風大爆導演錢文錡中意爆粗鬧演員，因他曾當錢的副導演，目睹不少。

Justin謂：「拍攝《蜜桃成熟時33D》時，其中一場戲需清場，我同另外兩位男角未要埋位，出面落緊大雨，但個景冇位走，我地三個避到最角落，點知導演暴喝一聲：『想䀹嘢呀！』，咁我地唯有避到室外，攞住紙皮遮雨，三條仔幾乎全裸（戲服只需穿內褲），好深刻！」

Justin 直認27歲前私生活很亂，包括男女關係：「果時人生邊有目標！中意去邊度點樣玩，完全冇顧慮！俾夠錢屋企，自己就可以放任自己！」直至在澳洲生活時遇到前女友，有心安定下來：「有諗住結婚㗎！但果一刻發覺自己先27歲，仲想返香港睇睇，一返就入咗行（模特兒），咁就冇再返去（澳洲）。」

茜利妹問Justin：「講真你同王宗堯係同門師兄弟，又走相若路線，競爭者囉，有冇Peer Pressure（同輩壓力）呢？」Justin回應：「你咁講，我第一年想打鑊佢添！」副主持Zero身為Justin老死驚爆：「吓！講得㗎？！我仲以為唔講得嘅！」即時增加張建聲的說法可信性。

Justin續道：「佢（王宗堯）又靚仔又好戲，啲女俾佢溝晒啦！果時我又新又有火氣，點都有啲敵意嘅！後來，大家都冇嘢撈（娛樂圈好現實），等緊工開，多咗時間傾計，傾吓傾吓發覺呢條友都唔錯，我當咗佢係一個哥哥、前輩，我有咩工作上嘅嘢都同佢傾，因為呢條友都幾care我嘅，同埋我自己心態都成熟咗，冇咁低能，冇咁易爆。」邵子風：「最深刻係阿Greg（王宗堯）講過Justin喺《壹獄壹世界：高登闊少踎監日記》中嘅表現係『少年萬梓良』，好期待！因為『萬梓光環』唔係人人承受得起。」Justin為戲中角式增肥50磅，現已減掉40磅。

又談及TVB兒童節目大改革，兩位男主持及Justin都大力懷念蓋世寶（姐姐），直認她是「J女郎」，Justin直認不諱：「索呀，佢真係索！眼大大，五官標致，最重要係，當時我踏入青春期，中晒！」