C AllStar拍攝《音樂殖民地》MV 大玩懷舊音響(附圖輯)

 

走校園路線的男子組合C AllStar,最近一反常態,除了新歌《音樂殖民地》更大玩電子風格,日前他們拍MV時更古靈精怪,鏡頭前表情多多。為配合MV後期製作,他們要即場聽導演指示對空氣做戲,憑空想象考執生和急才。

 

 

 

未埋位時,他們竟然不是各自玩手機,反而拿出飛行棋,波子棋和踢毽等一齊玩集體遊戲,原來最近他們愛上懷舊,陳健安(安仔)說:「最近因為新歌我哋接觸多咗音樂歷史和一啲以前既娛樂,其實以前資訊無咁發達,反而人既接觸親近啲,多啲人情味和感情,所以我哋想一齊開工既時候,爭取時間溝通,例如玩集體遊戲增進感情。」有時候他們無帶遊戲道具就索性猜包剪揼和傾偈,總之減少各有各玩手機,爭取互動機會。

 

 

而導演為配合他們的新歌《音樂殖民地》內容敍述聲音載錄的進化史,特別準備了黑膠唱片,巨型雙卡式錄音機、錄音帶、MP3、CD和MD等道具。對於C AllStar四個只有二十歲出頭的年輕人來說,這些東西可謂古董,未埋位時他們已經開始好奇地究研一番。成員安仔大呼有趣,他說:「呢啲以前錄音既東西我地雖然認識,但有啲未見過『真身』,感覺好新奇有趣,例如雙卡式收音機,體積龐大,花名竟然係『小露寶』,聽講以前啲人去沙灘玩呀,BBQ呀,就會用膊頭托一部,開大喇叭播歌搞氣氛,仲話用嚟識女仔,其實喺耳邊咁嘈既音樂點講嘢呢?好得意!」為了更了解新歌,C AllStar拍MV前找前輩教路,梁釗峰(釗峰)說:「我哋有備課架!除咗監製,我哋仲搵過林一峰,佢喺錄音室教我地點樣去聽黑膠唱片,原來又要掃塵又要小心用唱針,程序多而且要好細心。」何建曦(Jase)說:「因為好難放啱支針,而且會刮花唱片,所以以前係會整張唱片由頭聽到尾。」吳崇銘(King)自爆曾以為「食帶」是真把錄音帶吃下,三位成員立即起哄要他MV在中表演食帶,非常搞笑!