Honey Punch 再次迫爆商場!經典Cantonpop 炒熱全場 新歌勁舞連漢堡神偷都跳埋一份

女團 Honey Punch 深受客戶粉絲愛戴,工作檔期密到爆,日前再一次「迫爆」黃竹坑 The Southside 商場!現場氣氛火熱,粉絲尖叫聲此起彼落,反應勁熱烈。







當日她們先以《Cantonpop Medley》開場,精準呼應廣東流行曲主題,特意串燒多首經典金曲,一開聲就令全場大小朋友跟著唱、跟著跳,成功把氣氛炒到最頂。接著表演新歌《漩Turbulence》,舞蹈動作有勁又有力量,舞台張力十足。最搞笑的是——連漢堡神偷都忍不住跳埋一份!另一客戶麥當勞更即場喺 Threads 轉發,笑爆網民:「連神偷都忍唔住,Honey Punch 魅力十足!」

Honey Punch 彩排發生小意外 自嘲『甩鞋女團』誕生
不過最有「爆點」的,莫過於彩排時發生的趣事。Jacey 因為太投入勁歌熱舞,鞋底當場「啪」一聲脫落!工作人員即場飛奔上台協助貼回,Jacey 邊笑邊繼續完成彩排。事後她笑說:「上次已經有人甩過鞋,今次輪到我,真係坐實『甩鞋女團』稱號啦!不過鞋甩咗舞照跳,精神最重要!」其他成員亦打趣回應:「Jacey 你係咪特登想搶『甩鞋女王』封號?下次我哋一齊甩,做埋套甩鞋舞好唔好?」全團笑聲一片,場面超級搞笑。





除了商場演出,Honey Punch 近日更展開一連四場快閃活動,聯同師兄 Mike P.、師姐 Isabella,以及女新人唱跳歌手 Yumiko,走訪港九新界,每場快閃現場都人山人海,到最後一站銅鑼灣行人專用區更直接「塞爆街頭」!人潮把整條專用區都圍到水泄不通,歡呼聲連綿不絕,途人紛紛駐足影相打卡,場面非常壯觀。

Honey Punch 成員事後齊齊表示:「先感謝每一位支持我們的客戶,同埋每一位粉絲!工作再滿都好開心,因為有你們在,舞台先會這麼熱鬧。下次再見,我們會繼續用力跳、用力唱……鞋就盡量唔甩啦(笑)!」
這班「甩鞋女團」不但唱歌跳舞有料,連意外都變成話題,絕對是近期最有趣、最有人氣的女團之一。















