劉浩龍加入 Sony Music 後「頭炮」新歌〈綻放〉生日上架 視 Fans 為伴侶送上情歌

Wilfred 劉浩龍「師兄」早前完成個人演唱會《UNITED IN HEARTS 劉浩龍 2026 演唱會》，為 Fans 送上多首耳熟能詳的經典作品，如：〈思覺失調〉、〈94340634〉等，讓一眾樂迷大飽耳福。除舊作外，師兄亦帶同新作以及新動向回歸！除了在台上公布加盟 Sony Music，更將新歌〈綻放〉贈予樂迷。今（8月13日）適逢師兄生日，〈綻放〉亦正式於各大音樂平台上架，成他加盟 Sony Music 後第一首推出的作品。

情歌〈綻放〉贈予歌迷：「一班 Fans 就好似我嘅伴侶咁！」

〈綻放〉作為劉浩龍加入新公司後的首支作品，在演唱會演唱時師兄早向在場 Fans 揭曉歌曲是與樂迷有密切關係：「我希望嚟緊呢首新歌將會成為以後我哋開 Show 都會唱嘅大合唱歌，係代表我同你哋嘅一首歌。」〈綻放〉歌詞給人圍繞愛情主題的感覺，師兄表示雖然如此，但當自己在演唱會綵排望向觀眾席時，不期然便將歌中「伴侶」的情感投射於一路以來對自己不捨不棄的 Fans 們身上：「一班 Fans 就好似我嘅伴侶咁，一直陪我行落去！」因而師兄才決定將〈綻放〉視作與樂迷們間的連結。

透露曾一度逃避唱歌 今望憑歌表達自己早已無懼

師兄與監製周錫漢（Randy）今次首次合作，源起則因去年一個電視節目中師兄作為導師時與一眾擔任評判的音樂監製碰面，驚覺於一眾監製中僅未曾與 Randy 合作，因而很快便有一同創作歌曲的念頭。而籌備創作前，師兄與 Randy 分享自己這幾年間的心路歷程：「我同 Randy 講我終於唔怕唱歌啦！因為我有段時間對唱歌有包袱、逃避，但經歷咗舊年我終於鍾意返唱歌。所以就想做一隻關於我唔驚嘅歌出嚟！」

原名〈綻放男孩〉 師兄笑言：「呢個年紀都好難用男孩啦！」

Randy 就師兄的期望，很快便找到〈綻放〉的 Demo，師兄聽後不論對旋律抑或 Demo 歌詞亦十分滿意：「我哋兩個都好鍾意呢隻歌！本身都有諗過再填一份詞，但試唱後發現呢個旋律好適合而家比較易理解嘅詞，所以最尾用咗幾日同幾位創作人一齊慢慢修改，就有而家出街嘅版本。」雖然旋律與歌詞沒有太大改動，但師兄則表示唯獨歌名是必須改動：「我想講幾好笑，本身隻歌其實係叫〈綻放男孩〉。但都好難用「男孩」㗎啦，（我）都去到呢個年紀。」師兄笑言。

劍指高播放率歌手 承諾創作更多「劉浩龍式」情歌

當然〈綻放〉僅是師兄加入新公司後的「頭炮」，樂迷未來大可期待師兄更多新作。師兄提到自己加入新公司的願景時，表示希望自己能重返一位「活躍歌手」：「我希望自己唔係再幾年一隻歌！喺出完〈綻放〉之後會繼續創作更多歌曲，目標成為一個多播放率嘅歌手！」至於未來歌曲風格方面，師兄透露並承諾自己將創作更多「劉浩龍式」情歌：「樂迷係一定可以等到啲你哋鍾意聽嘅、以前劉浩龍風格嘅情歌！嚟緊我哋將會慢慢咁送畀大家！」

〈綻放〉現已於各大音樂串流平台上架，包含大量演唱會片段的 MV 亦上傳至 Sony Music 的 YouTube Channel，一眾樂迷萬勿錯過師兄的強勢回歸！