COLLAR 成員Marf、芯駖尾場嘉賓 許廷鏗「SANTA JAMBOREE音楽生活祭リ」

許廷鏗Alfred 一連三場戶外演唱會「SANTA JAMBOREE音楽生活祭リ」昨晚(12月26日) 順利完成，現場氣氛熱烈，一開始就有COLLAR 成員邱彥筒Marf、李芯駖出場，與Alfred合唱《青春頌》，又一齊跳唱，觀眾睇到high爆。

Marf特別揀穿印有「F」字的上衣, 話代表Alfred嘅fred字。Alfred 話今日是要接受一個挑戰，因為一個老人家要做後生女嘅嘢，要同佢哋玩一首歌，一齊跳唱《OFF/ON》，唱完之後Alfred話而家啲歌原來係咁難唱。

芯駖就話呢晚真係好似畢業禮爸爸帶個女出來，不過Marf則指Alfred不可以做爸爸，越來越瘦似哥哥多啲，搞到Alfred反問Marf :「你係話我返老還童 ? 做咩話我唔可以做爸爸！」

除有Marf、芯駖做尾場嘉賓，壓軸嘉賓有鄧小巧與Alfred合唱《微時》，Alfred更唱到哽咽爆喊，被小巧取笑「大喊十」：「我之所以喊係因為有次同你去Joyce( 鄭欣宜) 屋企，話如果有無限製作費及投資者支持做騷，你哋不約而同好興奮話做幾多場都得！可能我太理性，心諗如果要做好多場演唱會，把聲未必可以負荷到，但今次係我人生首次連續嘅三場演唱會，反而覺得唔夠喉。」

連續三場演唱會Alfred跳唱成焦點，笑言向跳唱歌手出發：「我行緊過去啦，其實從未試過做咁耐運動，今次演唱會瘦咗20磅，跳舞真係好有幫助，可能遲啲會同Joyce一齊跳舞減肥，我發現跳勁舞可以俾自己好大力量，我個Chok樣觀眾亦應該好受落，見到大家企晒起身，好多尖叫聲。」

Alfred話Joyce有送花籃支持，亦有傳短訊搞喊自己：「我好想同Joy ce下個挑戰書，希望2024年同佢一齊玩跳唱 ! 」