余逸思為「花斑茶社」擔任「一日店長」 推廣少糖飲食習慣

早前「全城減鹽減糖」專頁舉辦投票活動,市民於專頁的相關帖子「俾like投票」,投選心水茶飲店,活動最後由花斑茶社勝出。藝人余逸思(Yoshi)將為花斑茶社擔任「一日店長」,向市民推廣少糖飲食習慣。Yoshi日前現身花斑茶社的黃埔分店擔任「一日店長」,吸引不少Fans及途人圍觀及光顧,令Yoshi非常感動:「頭先有個Fans係由我選美嗰陣已經開始支持我,佢仲攞返當年嗰個應援名牌出嚟,真係好感動。」

 

環境及生態局及降低食物中鹽和糖委員會於2020年開始推出「少糖星期五」計劃,鼓勵市民培養少糖飲食習慣,一直深受歡迎。今年「少糖星期五」繼續得到業界的鼎力支持 ,與近150間茶飲店攜手推動「少糖」文化,市民逢星期五於已參與計劃的茶飲店,購買指定少糖飲品,或提出飲品「少糖」、「半糖」、「微糖」、「無糖」要求,即享減$2優惠!

首次擔任店長的Yoshi,自嘲是聲控機械人:「勁緊張,因為好多嘢要記,半糖、少糖、微糖,仲有好多唔同嘅配料,好彩有『貓紙』,但係我都仲未記到,最後有熱心嘅店員喺身邊提我。好搞笑,有張單仲有成25杯嘢飲,最後我沖咗兩杯,就畀店員叫我出去幫手收錢,做收銀可以直接同大家介紹『少糖星期五』,吸引多啲人嚟幫襯,哈哈。」Yoshi表示讀書時代,曾到雪糕店打暑期工,她說:「嗰時我返夜更,每晚都要搬好大筒雪糕,我仲打兩份工,最後壓力太大搞到生蛇。」

提到她最愛的手搖飲品,Yoshi笑指自己是瘋狂Fans:「高峰時期,一日一杯都得,夏天好熱就想飲凍飲,冬天好凍又想有杯熱嘢暖身,不過我一直都揀少糖。太甜除咗會肥,對健康都有影響,特別係25歲之後身體機能差咗,少糖真係幫到手,弗啲、皮膚好啲,連毛孔都收細咗。」除了少糖,Yoshi還分享她身材纖瘦的小貼士:「除咗飲食真係做運動,我每星期最少做一次,打拳同拉筋,不過我啲筋好硬,所以我係出去搵人幫我拉筋,真係好得㗎。」她又笑指自己手腳不協調,因此打拳是很好的訓練:「我仲會做pilates,可以鍛鍊埋深層肌肉。」