關心妍Jade 《時刻觸動世界巡迴演唱會》東莞站 羅力威擔任表演嘉賓

今年,關心妍Jade啟動入行18年首次《時刻觸動世界巡迴演唱會》,繼廣州站後,昨晚(28日)Jade在東莞舉行第二站,全場爆滿,不少香港歌迷更組團支持偶像,踏上台未開口,歌迷的尖叫聲已令Jade差點感動落淚。巡唱第二站,Jade請來好友羅力威擔任嘉賓,平時怕怕醜醜的羅力威,自爆Jade是他心中的女神,初入行在頒獎禮第一次見面,想了好耐先敢上前合照,羅力威說:「Jade太多歌打動我,亦影響咗我創作音樂靈感,初入行每次見到佢都心跳加速。」令在旁的Jade哈哈大笑,Jade說:「我嗰陣都結咗婚㗎喇,我同佢老婆(雨僑)好熟㗎!」Jade大讚羅力威彈得一手好琴,更即場鋼琴伴奏為Jade度身訂造的新歌《時刻》,然後兩人再合唱網路神曲《可不可以》。

首次在東莞開騷的Jade,特別把歌單改動,唱出歌迷在網上投選的歌曲,見到歌迷的熱烈反應,Jade說:「我知道今晚大家都係為自己嘅青春搶票,今晚等我帶大家返番去我哋嘅青春年代!」Jade一氣呵成唱出多首經典金曲《負擔不起》、《假使我漂亮》、《終點》、《你有心》、《我太強》、《手下敗將》、《放生》等,幾乎每首歌都是全場大合唱,現場氣氛高漲。

在個唱尾聲,Jade有感而發,原來她在開騷前兩星期失聲,經醫生診斷後發現她的聲帶出血,立刻要求Jade停止練歌,連做運動都唔可以,只可以閉關休息養聲,以免情況變壞,Jade說:「臨開騷前兩星期突然聲沙,馬上去睇醫生照聲帶,醫生話左邊的聲帶出血,好擔心,因為我真係好珍惜每一場演出及歌迷,你哋買飛等咗我咁多年,所以今日真係一個奇蹟,可以喺咁短時間內好番!今晚唱最後一首歌先敢同大家講,如果聲帶惡化可能要臨時取消,好感恩,多謝大家嘅支持,畀我嘅動力,令我把聲今日無事!」說罷,Jade唱出《關心…心妍》,再次感動爆喊。

Jade特別感謝老公,她說:「最慘冇得黐住個囡,連同佢玩和說話都唔得,最怕傳染佢,呢幾個星期老公好辛苦,每日帶心心出街玩。」東莞站圓滿結束,明年3月,Jade會將把巡迴演唱會帶到澳洲及美加,希望巡唱尾站可以返到香港舉行。

浩楠

Stars-hk 創辦人, 希望建立一個只談專業, 不談八卦的娛樂資訊網站。