雷深如 J.Arie 入行6年 為音樂廢寢忘餐

雷深如 J.Arie入行6年咁講：「其實我入行真係冇諗過要做明星，我只係想做一個可以日日唱歌同埋對住音樂嘅，人有人會覺得，我係讀法律出身，一定係屋企都有錢啦……我只可以話我父母而家生活得安穩就好啦，我唔會用屋企嘅一分一毫去養活自己。我自己賺幾多就洗幾多，每一分錢必須要用自己的一雙手黎賺返嚟。同埋假設就算有另一半，我都唔會鍾意洗男人錢！」

所以尤其新人之後嗰幾年好難捱，基本上都係搣緊新人頭嗰兩年賺返嚟嘅錢。亦都有諗有乜嘢part-time job做，幫補下生活費。試過去大學教唱歌同教琴，再幫學生補習。平時好少會買衫，只會借衫，畢竟藝人出鏡嘅衫只可以着三次（報紙、雜誌、電視各一次）哈哈！前幾年真係感覺到無力感好重，好氣餒，好似覺得自己明明已經塞爆曬schedule，但又唔係有好大滿足感成就感，又仲未係好供給到生活。

近呢一兩年我諗通左啦！其實如果我係鍾意音樂嘅話，我所有精神同時間都應該畀晒同音樂有關嘅嘢！其實音樂，唔一定係要寫歌比自己唱！可以寫歌成就其他歌手，或者用其他藝術方式呈現㗎嘛！呢度都要多謝林家棟同埋Paco，呀仲有古天樂先生，令到我有機會接觸到電影同埋演戲，今年竟然係以音樂形式參與到電影《獅子山上》既配樂同主題曲演繹。今年仲可以幸運地寫到一隻三台冠軍歌《Dream my Dreams》俾黃淑蔓，原來見到另一位歌手演繹自己寫嘅作品係咁驚喜同埋咁有成就感既！

2019年係J.Arie既破釜沉舟再重新出發之年。喺嚟緊嘅日子，我會繼續發掘唔同可以展現音樂嘅藝術方式。係，做音樂真係唔係賺到好多錢，但係佢餵飽我嘅精神，餵飽我嘅靈魂，所以相對地，食少啲着平啲係心甘情願！橫掂我寫緊歌嗰陣時都係廢寢忘餐，成日都會唔記得咗食飯全日㗎啦！