林欣彤生日願望 想用歌聲唱遍每一角落

林欣彤(MAG)向來痛錫歌迷,去年她冒著颱風之險與歌迷舉行生日暨見面會,今年她則忍著聲帶勞損之苦,與「彤伴」舉行一年一度的聚會;更因要養聲準備年尾舉行的演唱會,幾乎全程靠以電腦打字與歌迷溝通。未知是否每次聚會都來得不易,MAG席間看畢歌迷準備的回憶片段後,數度哭成淚人,令部分歌迷亦被感染淚如泉湧,場面感人。


以親民打扮現身生日會的MAG,甫上台即以沙啞的聲音向彤伴打招呼,並坦承聲帶出現勞損情況:「但係唔緊要,我一定會克服嘅。其實我聲帶勞損已經有一段時間,但我依然死忍,但我依家覺得我要照顧好自己先,先至可以有更好嘅表演畀你哋睇,我唔會辜負你哋等咗咁耐嘅呢個演唱會。」說畢,MAG即宣布其2018代表音樂作品《忍》,在YOUTUBE的點擊率已突破200萬,獲得全場如雷掌聲。之後,MAG即乖乖地遵守諾言,全程以打字形式與FANS溝通,除感激特意抽空前來的FANS及為是次活動出心出力的歌迷會幹事們外,更笑住問FANS「肚唔肚餓」,即席被封「窩心彤」。
雖然備受聲帶勞損情況困擾,但MAG與FANS們玩遊戲時仍投入非常,全程七情上面兼即時做出捧腹表情,十分可愛。不過當歌迷們呈上回憶片段時,MAG的淚水即時告急,更一度哭得要用紙巾捂臉。她事後亦一邊嗚咽,一邊在台上感謝歌迷們多年來對自己不離不棄:「 舊年演出舞台劇時,我已經發現聲帶有啲勞損,但我選擇咗唔理會,每場都盡力去唱去做,跟住之後所有嘅演出同做歌,每一個工作我都係盡晒力去做,因為我知每一次你哋(歌迷)都喺度,所以我好想全力去做。」
「依家做音樂好難,如果我休息得太多,或者偷咗懶,我驚我會辜負咗你哋,所以我就冇理自己一直咁衝。我其實覺得你哋可以有好多理由唔記得我,但你哋冇,所以雖然好多困難都好大,但大唔過你哋對我嘅愛,所以我咩都唔怕,我會喊我會攰我會驚,但我會好努力去照顧好自己,之後我會更有智慧去行我嘅路,唔會再死衝爛衝。我真係好多謝你哋,我唔知點表達對你哋嘅感激。」之後MAG唱出新歌《Da Di Da》,並透露該首感覺悠揚的歌曲,其實是在自己失意的時候寫的:「我想同我愛嘅人一齊去傳播愛,好簡單咁。係你哋令我有力量架,就算我好怕冇人嚟睇嘅嘢,你哋都一定會喺度。」
當談到今年的生日願望時,MAG繼續大玩感性:「好感恩我哋一直喺互相嘅低谷陪住大家,咁樣堅持到係好難;我哋嘅人生定必會遇到好多困難,但唔緊要,我哋有彼此、同埋我哋有愛。呢個係我最大嘅願望,無論任何事,我哋都係支持住對方嘅。」

浩楠

Stars-hk 創辦人, 希望建立一個只談專業, 不談八卦的娛樂資訊網站。