林雪、謝天華、洪天明 生日被杜sir鬧到飛起

IMG_ (20)

由趙薇、古天樂和鍾漢良主演的寰亞電影《三人行》在廣州開工,監製兼導演杜琪峯(杜sir)拍戲出名認真又惡死,任何不對辦,話知你是天皇巨星都一樣照罵,有時更加入助語詞,不過他罵得有道理,令人心服口服。大牌明星都無面畀,更可況是愛將林雪,7月8日生日的他在片場中渡過,生日流流被杜sir鬧到飛起,戲中還要被謝天華在屁股插一刀,插住把刀繼續拍開槍駁火戲,擒高爬地,鏡頭更對準刀傷處,連屁股都要做戲,演得不到位,杜sir開火狂插,鬧到飛起。其實杜sir都有「愛錫」林雪的時候,原定林雪戲中要死去,但正式埋位時突然叫他「唔使死住」,總算生日流流唔使死,大吉利是。

IMG_ (12)

事後林雪靜靜雞透露寧願死,他笑說:「因為要拍特別效果,死咗就落地靚唔郁就得,但唔死要慢動作典嚟典去,其他演員練習過,但我埋位先至叫我唔使死,練唔切,我怕典得唔夠靚又被鬧,咁係咪死好過唔死啦!」啋~ 雪雪不用謙虛,事實杜sir讚他典得好呀! 除了林雪,第一次拍杜sir電影的謝天華亦獲對方親自落場教走位和舉槍甫士,然後一齊邊睇重播,杜sir邊講解,再帶天華埋位嘗試。而穿著病人服裝的洪天明就在旁邊「偷師」,手機當手槍練開槍甫士,個個都非常投入。

IMG_ (17)

林雪天華天明七月星辰 片場百人大合唱切cake

雖然杜sir拍戲氣氛嚴肅又緊張,但他與劇組為當中3位七月星辰的天明(1日)、林雪(8日)和天華(15日)搞神秘生日party,捧出十磅大蛋糕,充滿溫情。杜sir、監製兼編劇游乃海、男女主角趙薇、古天樂、鍾漢良,與其他演員盧海鵬、黃浩然、王梓軒、譚玉瑛、龔慈恩、菁瑋和施祖男等,全場台前幕後百人大合唱生日歌。期間天華扮向古仔掟蛋糕,古仔又扮質天明個頭落蛋糕,古仔反擊捉住天華和天明kiss,兩人爭札未有就範,幾個百厭星左閃右避,趙薇和鍾漢良在旁觀戰偷笑,非常熱鬧。之後3位壽星仔一齊許願吹洋蠋,杜sir突然喝止:「林雪,因住你啲口水呀!」林雪醒目立即用手掩咀,全場爆笑。

IMG_ (6)

3位壽星仔異口同聲生日願望都是「身體健康」,天明說:「今年好開心喺片場一齊慶祝,正日喺香港同家人一齊過。天華,你都係想返去見囝囝啦!」一講到囝囝,天華立即甜到見牙唔見眼,說:「係架!我既生日願望呢…(天明插咀『生多個』) 哈哈,大家都身體健康,事業更好,每日都咁開心!」林雪希望健康又快樂,天華搞笑自爆送了一份「特別禮物」給林雪,就是他左邊屁鼓上的道具刀,林雪立即擰轉身屹籮展示假血假刀,天華一邊作狀插他,一邊得戚地說:「係我做架!」生日流流屁股開花,林雪笑說:「我會還返畀你!」

IMG_ (9)

天華《激光中》林雪《心太軟》聚餐掀高潮

晚上工作人員在酒樓聚餐,天明擺天華上枱臨時叫他表演唱歌,天華叫天明領唱,天明笑說:「我唱歌嚇走大家喎!」結果他唱生日歌,天華和林雪接力唱,然後全場大合唱。之後天華唱羅文的《激光中》,點知唱到尾聲甩咀被噓,最後唱完整首歌,連杜sir都拍手掌讚好。千呼萬喚,天華身旁的林雪拿起米高峰清唱任賢齊名作《心太軟》,hip hop服裝加人字拖造型,七情上面,連杜sir都在席上歡呼拍掌和唱,掀起全場高潮。

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。