《導火新聞線》 王宗堯:反映現實!

IMG_ (9)

港視話題神劇《導火新聞線》昨日和今日連續播出第1及第2集,這齣主要講述新聞工作者為主題的劇集,內容貼地,叙述了香港報館編採人員的搵料生涯及與時間、新聞搏鬥的血淚。當中飾演港聞記者輝爺的王宗堯一新耳目,掟開男神外殼,以踢拖又剝鞋兼衣衫不整的爛笪笪哩啡形象出現,馬甩味極濃。

IMG_ (2)

在播出的兩集中,王宗堯和同樣扮演記者的楊淇為cher豪門爭產案而放蛇,特登換上夜蒲戰衣向一名跟富二代有景轟的「萬能插」男子套料,但東窗事發,楊淇被追打,幸得王宗堯英雄救美,攬楊淇去後巷扮「依泣」避開一劫;而飾演報館總編輯的梁小冰為刮料不擇手段,除了獨行獨斷臨時抽頭版,以人狗交報道換去原來的鬧市爆炸案之外,又因得罪人於街頭被斬等等,以上情節都惹來網民大肆討論。不過,劇中一幕楊淇被炸彈狂徒鄭藩生擄走,鄭藩生兩度爆粗講仆街,其中一句對白「呢個仆街,我炸死佢有咩唔啱呀」,隨即引起網友爭議不絕。

IMG_ (8)

對於種種爭議,王宗堯說:「話套劇爆粗,其實電視空間係有監管,當初大家拍嘅時候係唔知劇集會喺網上播定係其他平台播出,大家只係好想反映現實,咁記者或者朋友之間好多時候都會講粗口,多少少呢啲元素,只要唔係太刻意,反而會更加生活化;至於放蛇,可能好多人以為係差人做,事實係記者為咗攞一單好爆嘅料,好多時身陷險景放蛇,所以都好睇到日常記者係做啲乜嘢。」

IMG_ (1)

王宗堯續說:「我記得拍嘅時候未發生劉進圖先生事件,所以呢套某程度上我哋覺得係神劇,因為寫咗好多新聞現象當時係未發生,日後一一應驗咗,歷史不斷重演,唔係話我哋預言啲乜嘢,只係有好多事件喺唔同國家為咗新聞為咗追求真相,新聞工作者嘅生命被受到威脅。至於抽頭版,好多時編採方針有出入,總編輯嘅取態亦會影響報紙風格;我覺得《選戰》反映好多政治當中的黑暗面,《導火新聞線》最希望俾記者朋友睇番,講番畀我哋聽有冇俾到佢哋共鳴。」

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。