樂壇女新人丁悅 20歲生日 ：「最想收到歌迷鼓勵說話」 (附圖輯)

樂壇女新人丁悅（阿丁）今個月17號生日，剛踏入20歲的她日前現身學校的校園Show，與學生們唱歌互動，在阿丁演出期間，學生們突然拿出蛋糕與阿丁慶祝生日，令其既驚喜又開心。

對於今年生日，阿丁透露自己已經收到7個生日蛋糕，「我咁大個女第一次收到咁多蛋糕，其實由中二開始我就好少慶祝生日，沒有再跟同學仔、朋友去唱K慶生，每年都只係同爸爸媽咪、哥哥食飯，好低調。」阿丁又續言覺得生日不應該慶祝自己，而是應感謝父母把自己生出來帶來這世上，所以由中二那年開始，她每年生日都是與父母、家人吃生日飯，吹生日蠟燭。

只是入行短短幾個月，阿丁已經得到咁多人疼錫，她坦白好意外同幸運。由於生日那天和聖誕節等日子，阿丁都需要工作，故此她已提前在16號同父母、哥哥、婆婆等家人食飯慶祝兼過冬。

今年收到7個蛋糕，問到阿丁有否因為咁而食肥？ 她就苦言由於近日生病，搞到只可以飲水同食清淡食物。另外，粉絲們都知道阿丁鍾意毛公仔，故此她今年收到好多毛公仔，不過她就呼籲粉絲們不要再破費，「因為每次送禮物都用到好多花紙，咁樣好唔環保，其實大家用白紙寫幾句說話，畫個公仔畀我，我已經好開心，再收禮物我會覺得唔好意思。」

除收到粉絲、朋友們送的禮物外，阿丁今年收到最大的生日禮物就是她剛推出的處女碟《19》大賣，不僅在HK Records銷售榜排行第一，更在HMV的Jazz & Classic流行榜中排行第5位。阿丁興奮表示：「作為歌手可以登上古典音樂榜，我真係覺得好開心，因為上呢個榜大多數都係歐美唱片同歌手，榜內在我上上下下歌手全是歐美歌手，好榮幸！」