周美欣夜店拍處女作《不失禮》MV (附圖輯)

2007年港姐季軍兼「魅力美腿大獎」的周美欣(Lori) 最近宣布投身樂壇做歌手,其實她在參加選美之前,已經是「新秀歌唱大賽溫哥華選拔賽」冠軍級人馬,歌唱實力不容置疑,加上五呎九吋高的她擁有43吋長腿,可謂睇得又聽得,簡直是雙重享受。日前Lori穿短裙騷「攞獎美腿」,為處女作《不失禮》在夜店拍處女MV,坦言這場景勾起她讀大學時失戀時傷心片段。

Lori說:「《不失禮》係我第一首主打歌,以前拍人哋既MV就拍得多,今次終於做自己既主角,心情既興奮又緊張。好多公司同事到場打氣,令我好感動,加上導演細榮(莊少榮)好有耐性咁教我演,好順利。」MV內失戀Lori找好姊妹開解,兩杯到肚心情轉好,三位靚女率領全場又唱又跳,勁high!她說:「導演知我第一次拍MV會緊張,所以安排有劇情既故事令我容易啲投入,而且感覺就好似我鍾意睇嗰種美式劇既風格,仲有兩位飾演我好姊妹既dancers帶我入戲,所以拍攝過程好順利!」

原來MV中的失戀故事,勾起Lori的傷心回憶,她說:「之前我無同導演講過自己既故事,但今日嚟到一路拍就令我諗返好多讀大學時既回憶,記得有一次我失戀得好傷心,幾個女仔朋友陪我去飲嘢散心,結果大家好開心咁跳舞,心情都好返晒!(借酒澆愁?)我唔好酒精,今日亦都無飲酒,剛才飲既都係果汁和汽水,如果真係酒我早就醉倒大家提早收工啦!」樂觀的Lori稱新歌中正能量的歌詞正自己的心聲,她又笑言朋友常充當紅娘,希望為她撮合姻緣:「我性格都幾灑脫,愛自由,但朋友成日都替我心急,仲借意介紹男仔畀我,其實單身都幾開心,依家事業行先,拍拖隨緣啦!」

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。