側田宣布「命硬演唱會」香港站開part2 7月16日優先訂票

側田今年5月在紅館舉行「命硬演唱會（香港站）」全場爆滿非常成功，慶功宴上他出口術自爆想開Part2，結果如願以償，「側田繼續命硬演唱會」(Justin Tough Live Restart)已定於8月29日紅館舉行。

票價分為 $550 / $300 / $200。今日（16日）至20日VISA、MasterCard、美國運通卡、中國銀聯卡、PPS、支付寶、PayPal卡戶尊享優先訂票服務。大會網上優先訂購：http://www.aegpromotion.com/Justin22013 或上午9時至晚上9時致電28 611 611預留座位。對於事隔短短三個月就再踏紅館，為演唱會開part2，側田表示非常興奮，他希望能以歌聲在2013年暑假留下美好回憶!

日前，側田現身廣州的酒店舉行記者招待會，宣布下月4日在廣州體育館舉行巡迴演唱會廣州站，過百傳媒和歌迷撐場，場面熱鬧。席上大會代表送贈側田一支懷舊金咪，寓意他首首金曲，百聽不厭。他立即歌癮大發，即場清唱一段《命硬》和《好人》，期間更手舞足蹈，側田表示演唱會上有一個向哥哥張國榮致敬的環節，希望用此懷舊金咪演繹以示對哥哥的尊敬。大會並即場宣布廣州演唱會票房喜訊，門票開賣反應熱烈，VIP貴價飛和部份平價飛都已火速售罄。

除了票房報捷，記者會更雙喜臨門，大會為七月生日的側田慶祝。歌迷早有準備生日蛋糕，但他們不是唱生日歌，而是唸打油詩。大約30位歌迷在台上表演唸詩，側田就在台下拿著手機拍片留念。打油詩內容除了讚他和撐他，還有催婚，側田聞言即露出哭笑不得尷尬表情。之後歌迷再三催迫，他突然露口風，甜笑著說：「我ready架啦，等多陣啦，總之有好消息就會講架啦！」全場起哄。然後歌迷分組玩扮側田擺chok甫士比賽，結果他玩埋一份，又扮chok又扮萌送飛吻，更與歌迷一齊扮千手觀音跳舞，非常搞笑。切蛋糕時他用手指當刀，還百厭地偷吃蛋糕上的忌廉，記者會結束後，側田主動要求留下來與歌迷逐一拍照和簽名留念，歌迷送他鮮花和禮物。

訪問時側田表示：「好開心歌迷一直支持我，喺我身上花好多心思，次次見到佢地都有驚喜。（剛才露口風ready結婚？）哈哈，未有咁快，不過我真係ready架啦，等女朋友決定。（求咗婚？）未呀，但大家有共識，由佢決定，始終女仔比較重視呢啲嘢，尊重佢意願！」廣州站演唱會的rundown，側田坦言比香港站多唱約十首歌，他說：「演唱會以音樂為主，我要少啲換衫，爭取時間多唱十首歌。（表演嘉賓呢？）香港站楊千嬅和恭碩良都係驚喜，目前我無為廣州站邀請嘉賓，到時有無驚喜就唔知啦！」