鄺星宇Alex新歌合唱Jess Law 甜蜜氣場獲激讚「CP感極強」

鄺星宇（Alex）最近推出全新單曲《Day Zero》，今次特別邀請到 Jess Law 友情 Featuring！雖然二人之前唔算好熟，錄音期間都只係見過幾次面，但原來自前期籌備開始，佢哋為咗傾歌嘅唱法，經常深夜隔空討論，意外發現彼此極度合拍，默契仲速遞式升溫！

錄音室幕後趣事：認真論歌變「零食交流會」
講到錄音期間嘅趣事，Alex 爆料話二人一開始為了拿捏歌曲中微妙嘅情感，成日喺深夜傳語音訊息研討細節，Jess 仲大讚 Alex 對音樂要求超高又細心。不過最搞笑係，當二人第一次正式入錄音室合唱，原本以為要好感性、好嚴肅，點知 Alex 為咗幫JESS放鬆心情，竟準備咗好多零食！Jess 笑言：「我哋有一半時間係一路食零食、一路研究歌詞，氣氛輕鬆到不得了！」Alex 亦補充，因為二人成日喺錄音室「因小事無啦啦爆笑」，連監製都忍不住笑問『你哋到底有咩咁好笑？』，令成個錄音過程喺極度歡樂嘅氣氛下順利完成。

拍攝現場默契爆棚 眼神對視秒「破功」
呢份喺錄音室累積落嚟嘅默契，仲直接帶到去 MV 拍攝現場！喺拍對視戲份時，二人成日一對上眼就無啦啦爆笑，多次喺鏡頭前「破功」。往往一方都未開口，另一方已經忍不住嘴角上揚，出現「你笑完到我笑」嘅連鎖反應。導演原本想叫佢哋保持唯美嘅表情，但 NG 咗好多次之後，索性順其自然，直接保留笑場片段，意外營造出勁有渲染力嘅甜蜜氛圍！其中一場深情對視，Jess 因為 Alex 一個無意嘅眼神而笑到連膀頭都震埋，Alex 隨即跟住笑場，呢段完全零準備嘅自然互動，最後竟被剪接師全數保留放入正片。

三成鏡頭即興發揮 粉絲大讚「CP感爆棚」
MV 入面有近三成鏡頭都係二人嘅即興發揮。Alex 同 Jess 回想返當時都忍不住笑：「我哋真係咩都冇做，只係望住對方就覺得好想笑。」導演最後都無奈大喊：「唔好理鏡頭啦，當我哋唔存在啦！」點知放開嚟演嘅效果出奇地好。

今次「錯有錯著」以真實互動為核心嘅 MV，唔單止打破咗傳統情歌唯美高冷嘅框架，更以「笑場即愛情」嘅另類詮釋，將拍攝現場最真實嘅歡笑同火花呈現畀大家。MV 上架之後，二人自然流露嘅默契更獲大批 Fans 留言激讚「CP 感爆棚」，紛紛希望佢哋未來有更多合作！