【我要做主播】練樂儀撞樣麥詩敏　陳啟泰都認錯 公開試中文口試5星口才超班

HOY 電視節目《我要做主播》開鑼，超過100名參賽者爭住坐主播台！當中最具話題性莫過於 練樂儀（Alina）！外貌仲同新聞主播 麥詩敏有幾分相似，就連評判陳啟泰都認錯！加上公開試中文口試考獲5星佳績，口才絕對獨當一面，隨時成為今季比賽黑馬！

撞樣麥詩敏　陳啟泰都認錯
練樂儀參選消息一出，網民話佢同麥詩敏樣貌同氣質接近，連講嘢語氣都似！最搞笑連擔任評判陳啟泰、方健儀都認同！Alina笑言：「都有人話似AGA 江海迦、Miki 楊愛瑾，都開心架，係一種讚賞！」佢仲話有機會合照睇下大家有幾似。

公開試中文口試5星　口才超班
練樂儀爆讀書時期公開試中文口試仲考獲5星的驚人成績，證明佢口才表達能力超班。Alina話：「小時候會望住電視機的人讀字幕對白、做戲，選美入行累積唔少公開演出經驗、做活動司儀，更加練習隨機應變同執生能力。」

選美冠軍級人馬、護士加分
練樂儀參加國際小姐（Miss International）選美總決賽，奪得季軍同「MISS SDGS」兩個獎項，成為雙料得主。有選美經歷加持，Alina 著起西裝坐主播台，無論儀態、氣質、上鏡感都勝人一籌，更有專業醫療護士背景，講解健康資訊絕對權威、公信力，網民話：「去 #健康關注組 ！」

練樂儀坦言為參加《我要做主播》，每天睇早晚新聞及天氣新聞報告，望住電螢幕的字幕練習咬字發音，想一嘗做電視主播夢想，也是難得訓練好機會，學習專業新聞播報同節目主持技巧。