區瑞強7月舉行《Albert再重聚(私房)音樂會2026》 區瑞明及囝囝區昕進出任表演嘉賓 全場觀眾送限量Cap帽及神秘禮物

區瑞強（Albert）將於2026年7月24-25日（星期五及六），於香港理工大學賽馬會綜藝館舉行一連兩場《Albert再重聚（私房）音樂會2026》。這次演唱會Albert邀請了胞弟區瑞明（Alvin）和兒子區昕進（Adrian）任嘉賓，組成「6A」，還有靚聲好友Vincie，為歌迷朋友、粉絲舉行一次最「私房」的親密演唱會 ，Albert還會送上兩份禮物給全場每位觀眾。

區瑞強在今日（17日）記者會上表示，今次並非單純家庭演唱會，他期望辦一個別開生面的音樂聚會，「我希望將一啲欣賞我嘅朋友同埋粉絲，大家聚埋一齊，唔同一般嘅大型演唱會，裏面有啲特別安排，第一就係搵咗我屋企人，我細佬同我個仔參與，原因係畀到個親和感覺，希望大家以後加入呢個Group，係一家人嘅感覺。」Albert期望今次演唱會將有點像粉絲聚會一樣，「今次完全似係一個私人聚會，有啲似其他歌手搞嘅Fans Club Party，但係我唔一定要有Fans Club，今次演唱會我自己啲朋友都會嚟，係朋友加粉絲加自己屋企人，做一個親和嘅「私房」音樂會。」

區瑞強又表示，今次演唱會的觀眾亦貴精不貴多，雖然場地有1000多座位，但只賣地面坐位門票，「樓上坐位門票我係完全唔賣飛，所以每場得返700位左右，兩場加埋真係好少人。」Albert為與觀眾更親近，還有特別方法，「我好想同觀眾近距離接觸，大家親近啲，我會安排喺觀眾席附近表演，雖然未必每個觀眾都可以握到手，但係每個都算係握手位。」在歌單方面，Albert亦會有特別安排，「以往好多粉絲都投訴，有好多sidetrack嘅歌，我嘅演唱會好多時都未必有嘅到呢啲歌，今次就會有機會唱返。」當日演唱會還有個特別安排，就是觀眾可以即場向Albert發問問題，「觀眾除咗可以即場點歌，仲可以即場問我問題，就算係私人嘢都可以問，我做咗咁多年DJ完全唔擔心唔識得答啦！」

區瑞強坦言專登搵胞弟區瑞明做嘉賓，還笑言當日Alvin參加《中年好聲音3》時，卻沒有通知他，「如果佢當日有通知我，我可以教佢啲技巧，可能唔止去到60強啦！」

Alvin解釋以往好早被淘汰，「嗰時係囡囡幫我報告，以為海選完就冇得玩，冇諗過可以入到100強。」Albert和Alvin還即場合唱自彈自嘅《What a Wonderful World》。另外，Albert為了這個特別的演唱會，還準備了小禮物送給現場每位觀眾，「自己開Group嘅情趣，我會送兩份禮物畀佢哋，其中一樣係印有呢個Group Logo嘅Gap帽，因為我係鍾意戴帽，另外仲有份神秘禮物，到時先公開。」

《Albert再重聚（私房）音樂會2026》
主辦機構：紫銀星音樂出版有限公司
舉行日期：2026年7月24-25日（星期五及六）
舉行時間：晚上8時正
舉行地點：香港理工大學賽馬會綜藝館
門票價格：$680 / $480 / $280
票務資料：門票於Cityline購票通公開發售
開售日期：2026年6月10日
節目查詢：2744 5191