江美儀向馬鞍山街坊豪派禮 《女神配對》Yuki 靠瞓保靚樣「母女檔」孖住剪綵

視后江美儀和人氣女神羅毓儀（Yuki）先後參與劇集《下流上車族》及話題戀綜《女神配對計劃》，昨日（8月23日）這對「母女」繼續孖住出擊，齊齊出席馬鞍山新港城中心 Q Foods Mall（俏貓貓優質生活百貨）新店開幕活動，與該店公司董事陳敏一同擔任剪綵嘉賓。活動後，她們即場向市民親自派發過百份大大袋的福袋禮物，吸引大批街坊打卡捧場，場面熱鬧。

Q Foods Mall 自去年成立後業績穩步上揚，在現今市場逆境下更開設第4間分店。作為品牌引入的韓國美肌健康產品 Hankook NMN collagen 香港代言人的江美儀，與「囡囡」Yuki 亦於活動上分享不同 generation 的保健之道，提醒大家要關注健康。

Yuki 一向被人形容為童顏，她笑指自己的凍齡秘笈就係瞓：「我鍾意瞓覺，如果冇嘢做會瞓8至10個鐘，後尾發現原來瞓得多對皮膚、新陳代謝都好好；如果大家想凍齡就盡量唔好捱夜，瞓多啲；同埋平時做多啲運動，皮膚會好啲。」Yuki 雖然年輕，但一樣會保健，「因為拍劇要捱夜，有時好 chur，冇得休息，都會食啲保健嘢保血氣同 keep 住狀態。」

江美儀對美肌、健康都有自己的方式，但一切都很簡單，她說：「我覺得所有養生保健都係由你食啲乜嘢、做啲乜嘢先有咁嘅效果，我唔相信有個人咩都唔做可以 keep 到靚，呢個世界只有懶女人，冇唔靚嘅女人，所有嘢要付出嘅，譬如我食嘢食得好清淡，我好少食濃味嘢；要運動要出汗；我都會食 supplement 補充返。」江美儀皮膚緊緻，保養得宜，她也分享道：「要用啲冇刺激性嘅護膚品或者化妝品，同埋我自己有個習慣，唔使見人就盡量唔化妝，化妝品始終有少少化學物質會令到皮膚乾、色素沉澱；而做運動好緊要，出完汗個人好似換咗塊臉咁。」