陳展鵬接受新城《Ben同Benson『Chur』到行》錄音訪問 與太太在愛女面前大講「I Love You」 感激單文柔「賜」自己一個家

藝人陳展鵬接李有毅（Ben）和兒子李國煒（Benson）主持的新城《Ben同Benson『Chur』到行》節目錄音訪問，展鵬跟Ben除了是鄰居，更因為打高爾夫球而成為好友，三人在節目中無所不談，展鵬談起太太單文柔（Phoebe）和6歲女兒陳諾瑤（小豬比）即滔滔不絕，獲Ben大讚：「展鵬有運動員嘅骨、演員嘅魂、伴侶嘅愛、父親嘅心。」

展鵬小時候因興趣而自學乒乓球，他自12歲開始便參加區際比賽，並獲教練推薦加入體育學院，後來用了五年時間獲選入香港代表隊，展鵬表示：「我中一至中五去咗青年軍，中五時開始見嘅世界大咗，尤其係面對我哋嘅國家隊，係冇得打，差好遠，因為大家訓練水平唔同，但都開心嘅，運動可以培養我輸得起，過程有好大磨練同挑戰，我有金句就係『輸到唔怕輸時，你就有機會嬴』。」然而，展鵬知道自己的不足，若果繼續訓練，就要離鄉別井，前往內地或其他地方深造，最後他放棄了乒乓球重返校園，中學畢業後便加入娛樂圈，並順利登上視帝寶座。

Ben在節目中爆料，透露展鵬與Phoebe經常在屋苑附近踏單車，十分浪漫；提到兩人的家庭生活，展鵬表示：「大家都知Phoebe因為選港姐，之後畀我私有化，好開心呢段時間識咗太太，畀咗我另外一個階段，我以為呢個階段已經過咗，可能5、60歲仲係單身，或者只係拍吓拖，所以現階段好開心，仲有埋小朋友。」Ben又表示要分享見證，稱展鵬教太太打高爾夫球時十分溫柔及有耐性，讚他是好老公，展鵬即表示：「因為打golf好易受傷，受咗傷就乜都玩唔到，仲會影響到生活。」

展鵬鍚小豬比鍚到燶，身為廿四孝爸爸的他，最希望女兒似媽咪，「通常女都會似爸爸，尤其係性格，我最驚個女似我唔好嘅性格，好想佢似媽咪。」而展鵬和Phoebe在愛女面前，經常都會講「I Love You」，展鵬笑言：「未識太太之前好少講，通常拍戲先講，依家就將呢句掛喺咀邊，佢好感染到我，希望阿女都感染到。」