拍片探索本地文化 Vian與外傭舞團Battle Evelyn沿電車線搵食 茶檔打邊爐拮燒賣

蔡穎恩（Evelyn ）與小師妹連家穎（Vian）最近與新平台「非常港」(Hong Kong Never Normal) 合作，以新奇有趣的角度，探索香港獨有城市面貌。熱愛跳舞的Vian，突襲周日的中環皇后像廣場和海濱公園，與放假的外傭姐姐舞團一齊跳BLACKPINK的《DDU-DU DDU-DU》，姐姐們一字馬end post 令Vian驚喜。而Evelyn 就化身美食嚮導，沿電車路線介紹香港特色美食。

Vian身處中環行人專用區，說：「我以為星期日啲姐姐放假只係傾吓偈，原來佢哋好犀利，我仲見到佢哋排舞，為聖誕節跳舞比賽練習，我喺旁邊都學咗幾招。」說罷她手舞足蹈跳了幾步，有板有眼。「我最初以為我哋語言唔一樣好難溝通，但跳舞係我哋共通語言，我哋仲一齊跳舞，好開心。」

至於Evelyn 就化身美食嚮導，從大坑出發沿電車路線開展搵食之旅。她說：「今次好開心同『非常港』平台合作介紹香港，因為我好鍾意食嘢，所以從美食出發。第一站係大坑嘅茶檔，我第一次搬出嚟住就喺大坑，帶大家去我好鍾意幫襯嘅茶檔，招牌菜『滑蛋叉燒飯』好有香港特色，融合咗西方嘅滑蛋同埋中式嘅叉燒，煮成非常之靚嘅蛋包飯，仲配埋特製蔥油豉油，錦上添花。」而每日限定雙層鮮牛油菠蘿油，以及充滿她的童年回憶黑椒豬扒飯。「我私心仲有茶檔嘅車仔麵，每次揀配餸都有選擇困難症，而且除咗配粉麵，仲可以揀腸粉底，好特別。」Evelyn 邊講邊吞口水。

然後Evelyn 搭電車去灣仔拮燒賣，她說：「香港人好忙，但會喺忙碌與忙碌之間嘅小空檔，喺街邊小食店買一串燒賣魚蛋填肚，安撫心靈。一般會點豉油辣油，今日嗰間店仲有沙爹咖哩醬，非常好味。大家會好小心烏低身咁食，因為唔想啲汁整污糟件衫，而旁邊繁忙嘅馬路啲車『蓬蓬聲』飛馳，個畫面好有趣，好有香港特式。而且街邊燒賣同茶樓燒賣好唔同，茶樓通常啖啖肉，小食店一定係食魚肉燒賣先至最有風味，所有旅客嚟到香港一定要試。」她自爆拍攝時即使很小心，仍被醬汁濺到衣服，非常遴迍又搞笑。

尾站Evelyn 帶團隊去火鍋店「打邊爐」，她說：「喺香港打邊爐好熱鬧，你有你講、佢有佢講，突然之間會斟酒、舉杯、起哄，要感受香港氣氛一定要去最嘈、最吵鬧嘅地方打邊爐！香港人打邊爐非常講究，先飲湯享受鍋底原汁原味，我自己最鍾意食竹笙，因為吸晒啲湯又脆飲到啲湯，口感好有趣。」她欣賞火鍋店裝潢充滿老香港特色，除了布置成80 年代屋邨模樣，還有霓虹燈大牌坊。

著重儀式感的Evelyn ，生日與結婚周年都因工作無法慶祝，她說：「以前我會好重視呢啲節日，一早諗定好多節目，但可能去到30幾歲，儀式感仍然要有，但係最緊要同邊個度過。（聖誕節呢？）我諗都係打邊爐㗎啦，香港人諗唔到食乜就打邊爐！」