per se〈也許沒有未來神〉MV導演麥曦茵再度聯手 呈現自主人生

詩式流行組合per se剛剛驚喜加盟香港Sony Music後，即推出新歌〈也許沒有未來神〉，歌曲由成員Sandy及Stephen共同作曲、編曲及監製，歌詞部份由Sandy操刀。歌曲靈感來自年青人遇上問題時有時會走進牛角尖，也許有人會認為「神」會給予指引，但所謂的「未來神」（喻意成年人），可能只代表著周遭的聲音，試圖讓你認為遵從既有的標準一套便是最好的選擇，但每個人自身也有想法，找到自己獨特的角色，比起滿足別人的要求更為重要，Stephen說：「歌曲寫一個欠缺自信嘅學生去搵預言家角色嘅『未來神』，呢個神對學生提供ABCD套餐，只要跟住做就會引領到以後做唔同嘅職業，但呢啲『未來』都唔係學生自己想要想做嘅，『未來神』所講嘅嘢就如親人或老師，會認為某啲職業先搵到錢，同埋先叫成功同有地位，但對學生嚟講，呢啲人並非神，而『未來神』係咪存在都唔重要，因為冇人確實知道未來會點，反而自己去發掘自己所想，即使未必係世俗所認為嘅成功，但搵到自己嘅角色先係對得住自己，亦係成功嘅一種。」

per se去年已有三首歌曲找來著名導演麥曦茵執導MV，今次繼續合作，更有驚險事發生，Stephen說：「今次〈也許沒有未來神〉同之前一樣，無論MV橋段或者故事發展，都係我哋一齊傾一齊度，今次亦係第一次有咁多夜晚嘅場景。其他演員晏晝已經開工，但我同Sandy夜晚10點開始拍到凌晨4點。拍攝地點喺山上面，大家都要開著自己手機燈好小心睇清楚條路驚仆親，都幾難忘。今次更加係我哋第一次玩火，當中Sandy要射出一支燃燒嘅箭，由於Sandy好驚火，我都好擔心佢，第一次因為射得唔好跌咗喺Sandy腳側邊嚇親大家，好驚燒著佢，好彩練多幾次之後Sandy愈來愈純熟，我哋講笑話下次奧運搵佢去揸火炬都唔驚啦！另外希望大家特別留意裡面飾演代表唔同職業角色身上嘅服裝，例如其中一隻雀仔角色嘅羽毛係用手套整出嚟，用咗唔同日常用品變成動物嘅身體部份，好特別。」

加入新公司，對於per se也是一個挑戰，Stephen說：「今次係一個跳出咗舒適圈嘅決定，之前就算簽廠牌都係比較indie去做，好多策略性嘅嘢都係我同Sandy決定，出歌都當係試驗，亦唔需要同人交代太多；今次加入Sony Music 個team大咗好多，好多嘢會跟timeline去做，唔會好似之前自己想幾時做先做，不過我哋都係趕急嘅人，所以問題唔大，最大唔同係team大咗多咗好多溝通。今次決定加入新公司係希望每首歌可以接觸同影響到嘅人會更多。」未來per se會計劃推出專輯和舉行音樂會，繼續推出英文和廣東歌，和不同國際單位合作，他們更希望跟管弦樂團合作，尋求更多外地音樂節演出機會，將per se的音樂帶給更多人。

「成功」兩個字不用別人來定奪，未來由自己開創。對於仍然在掙扎的人，可以聽一下〈也許沒有未來神〉，Stephen說：「歌曲的主角對未來仍有恐懼，其實可以慢落嚟，退一步，呢刻你認為最大件嘅事都唔需要急，盡量諗解決方法，唔好只係俾情緒帶動。我哋寫呢首曲希望作為年青人嘅一種陪伴，亦想佢哋知道未來仲未定，唔係喺讀書時期已經注定你一世係咪會成功。」也許沒有未來神，捉緊當下好好活出自己的人生。