何展睿赴澳門挑戰高空滑索搵靈感

香港唱作歌手何展睿Steve年初接連承受兩隻愛犬離世之痛，但他一向積極樂觀，藉著進修充實自己之餘，更笑言進行「報復式旅行」散心兼尋找靈感創作：「好彩自己教琴時間彈性，趁疫情結束後去多咗旅行，幾個月去咗七次旅行(包括日本、台北、高雄、澳門)都係短程旅行，岩岩生日係台北過，買咗好多地道小食慶祝，老婆仲係當地文創展覽買隻靚錶送比我當生日禮物添！除咗散心，我係唔同地方進修同拎靈感創作，幾個月去旅行創作既新歌數量可能係幾年加埋咁多，呢個就係旅行的意義！」

講到近期最難忘之旅非澳門莫屬，Steve表示每次去澳門除了到大三巴朝聖、尋找美食、買手信外，當地一直給予他創作靈感。近日再次去澳門旅行兼挑戰刺激活動，原來有箇中原因：「幾年前創作歌曲遇上樽頸，就即刻去澳門慢活，最後夜晚係街上搵到靈感。近期打完9號風球後即刻去澳門玩，係條手信街行行下又有靈感飄過，輕鬆作完一首歌，我同澳門好有緣。岩岩再次去澳門食完下午茶之後就挑戰「空中滑索」，算係人生第一次。原因係為我出年大碟中一首有關飛翔同自由既歌搵靈感。」

問到挑戰空中滑索，他笑言既享受且興奮：「之前幾日發夢都諗住空中滑索，玩之前一晚仲瞓唔著。當日玩嗰陣係黄昏，見到個夕陽好靚，自己膽粗粗第一個出去玩，推出去個刻好刺激，好彩無咩離心力，所以係半空幻想自己好似隻雀仔自由飛翔，沿途仲欣賞風景，去到中途興奮到大叫老婆我愛你，哈哈！教練叫我下次挑戰笨豬跳，我話太刺激啦，好似墮樓咁，自己心臟負荷唔到。除非音樂上要呢種經歷，否則唔好攪我！」