UTO娛樂| 超人的能量 | 林超榮：打針好橋逐個捉

天下好橋，唯快不破。

好橋人人會講，只說不去做。有地產商二話不說，就來一個打針送樓大抽獎。好橋一出，全球哄動。

這一條真係好橋，樓價區區千萬，就做到全港頭版兼黃金時間播放，網上熱烈討論，你拍條樓盤廣告片，成本千萬，也沒有這一個效果。

打針送樓係創作人一個好示範，好橋，想得快，不如做得快。有好橋，不如找到欣賞好橋的人。一條好橋，沒有人執行，就是空談，實現好橋，要人肯落重本。

另一條好橋，係打針送相睇套餐，既有大膽創意，又好羅曼蒂克，不是人人接受。但是，我欣賞背後的理念。

點解打針的人會去相睇，因為，這一對打針男女，雖然互不相識，背後有一個共同信念。他們都肯打針，共同抗疫。打針的人不多，只有一百多萬，又係適婚年齡，買少見少。難得有肩擔，必然有共識，話題會啱key。

飲食業界，慘被疫情蹂躪，依然不減熱誠，想盡好橋，鼓勵市戶打針，推出七月七折計劃。疫情肆虐以來，飲食業界真係疫來順受，政府所有措施，全面配合。禁堂食就搞外賣，你話幾多人就幾多人，收幾點就收幾點，聽聽話話。食肆要個鮮風機，即叫即辦，絕不敢詐型，但求疫情可以清零。你話有良好市民，就有如此良好企業。

林超榮