林子博孖麥貝夷開SHOW

由亞洲電視、Platt Nera及悦民有限公司主辦,17LIVE協辦的《Asia Music Show 亞洲音樂秀》即將在11月21日舉行。出席記招包括麥貝夷、林子博、2018亞洲小姐冠軍梁雪瑤及2019亞洲小姐張可盈。

當媒體慰問林子博今天已開始排練,是否已經收拾心情?他強調想盡快再投入工作:「其實我OK嘅,但係有時都會遇上一啲歇斯底里嘅時候。尋晚當我睇番自己個節目《大叔要變身》嘅時候,我又攬住對仔女喊到收唔到聲。個節目係我太太傾嘅,亦都隨著佢走咗而煞科。好似今次音樂會一樣,都係在我太太走之前應承咗一個老朋友,咁我當然要專業地履行我嘅承諾啦!而今次音樂會,我剛巧都揀咗一首《忘記你我做不到》,也貼及我現在嘅心情。」

至於久未公開露面的麥貝夷,則希望繼續可以發展音樂事業:「近期少咗好多活動,所以演出機會亦相對減少。所以我專攻網上宣傳,而好快我亦會推出自己喺網上教英文嘅Vlog,因為我本身大學係讀英國文學的。」子博聽到立刻笑言話要帶子女報名,但首先要在音樂會同貝夷合唱:「其實之前我哋兩個喺微電影曾經合作過,但唱歌真係未試過,當然要好好把握機會啦!」

對於亞姐選舉後,亞洲電視看來想作多方面嘗試。亞洲電視控股有限公司執行董事陳偉傑先生被訪時稱:「疫情期間,好多演唱會都未能如期舉行,希望透過亞洲電視這個平台能夠為觀眾帶來一點娛樂,藉由這個平台發掘更多有潛力嘅歌手及新人。亞洲電視於未來日子將籌備更多節目,當中會包括有音樂、電影、劇集及其他綜藝娛樂節目。」

至於17LIVE與香港電視台合作直播節目,人氣主播梁爽覺得這次把直播文化更普及化:「其實以前好多網上直播都偏向自家製作,但疫情迫使好多中大型嘅專業製作活動都利用直播平台。相信今次合作可以令演出活動能擴闊播出渠道。」

浩楠

Stars-hk 創辦人, 希望建立一個只談專業, 不談八卦的娛樂資訊網站。