姜濤4月30日牛一 推出新歌《蒙著嘴說愛你》

人氣組合Mirror繼成員Ian、Anson Lo、AK及Jer後,姜濤接棒成為第5位成員,於4月30日生日當天,推出第4首個人單曲《蒙著嘴說愛你》,希望在新冠肺炎疫情下,為樂迷帶來滿滿的正能量。

〈蒙著嘴說愛你〉是以疫情借題發揮,鼓勵大眾,姜濤分享道:「歌詞裡面鼓勵大家即使戴住口罩,都可以將想講嘅嘢講出嚟,不過歌曲最想表達係,而家遇到乜嘢困難,甚或人生遇到乜嘢困難,其實都應該堅持落去,因為冇咩係解決唔到,包括呢個疫情。」

為了達至最佳效果,今次經理人花姐特別找來她的師傅、林嘉欣老公袁劍偉執導MV,組合Error成員肥仔更為MV編舞,而隊友Lokman、AK、Anson Lo及Edan亦會於MV客串,姜濤解釋今次安排道:「Mirror有12個人,疫情下唔希望太多人聚集一齊工作,所以隨機抽咗幾個同我一齊拍,因為〈蒙著嘴說愛你〉唔係關乎我一個人嘅歌,而係關乎所有人嘅歌,所以都想多啲人參與。」其實政府早於3月底已實施「限聚令」,所以即使MV在拍攝外景需申請不反對通知書前已開拍,但袁導都構思了別開生面的表達手法,好等MV可在室內拍攝,不過在拍攝期間,眾人如非必要都嚴守1.5米的距離,姜濤與肥仔不用埋位時更認真到用呼拉圈量度距離,場面搞笑,而姜濤在一些小習慣上都略作改變以應付疫情,他說:「因為拍MV期間真係冇辦法戴口罩,所以盡量同人講嘢都保持一定距離,飲嘢都只會飲自己嗰啲,唔會搞錯,因為平時都會隨便飲其他人嘅嘢,而家就唔會了!另外仲有勤洗手,一cut機有時間就會即刻洗手。」

由於疫情關係,近日姜濤除了工作以外,都不會外出,就連Mirror隊友都很久沒見,他說:「好多工作都停晒,所以拍呢個MV算係大家呢一個月以嚟第一次見,疫情期間我試過最長留喺屋企一、兩個禮拜,喺屋企都係練歌,prepare(預備)下呢隻歌點樣表達啲歌詞。」〈蒙著嘴說愛你〉將於明天(4月30日)推出,這同時亦是姜濤的牛一,被問到生日願望,姜濤表示希望疫情盡快減退,他說:「因為唔單止牽扯到更多人嘅生命安全,而且疫情快啲好返,大家就好快回復正常工作,可以盡快同大家見面。呢個都算係自私嘅願望,因為疫情好返,有好多工作計劃就可以繼續進行。」

《蒙著嘴說愛你》MV將於明天在Mirror社交網站專頁首播,MV結尾還有彩蛋,敬請密切留意。

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。