[新歌推介] 雷深如、小肥合唱歌《哪懼牆攀不上》

雷深如 J.Arie 同小肥係一齊入錄音室錄呢隻電影《獅子山上》主題曲《哪懼牆攀不上》。第一次聽呢首歌嘅demo, 令我不期然想起林德信爸爸林子祥D歌，有種好澎湃、好激昂、好牽動到情緒嘅感覺。

本身都係諗住男同女嘅部份都係低8度唱，應該好容易好快就錄完。點知原來導演係想我哋高8度唱，咁真係好有林子祥《海市蜃樓》嘅感覺囉！不過小肥難道高好多，始終男仔高8度唱，唔係人人做到，我諗小肥真係圈中數一數二可以唱到嘅年輕男歌手！而我嘅演繹方法，都同之前唱過嘅歌好唔同。今次需要好有力量，好鏗鏘嘅演繹，最後仲要拉一個超長又高音嘅長音！

今次韋啟良為《哪懼牆攀不上》嘅編曲只有鋼琴，但係個編曲已經好牽動到情緒，所以喺聲音演繹上要跟著鋼琴嘅情感走。我同小肥真係好似演緊一個劇本咁，4分鐘嘅歌已經好似演咗一套1小時30分鐘嘅電影咁！另外，入戲院睇戲嘅時候會聽到配樂大部份都係acapella (無伴奏合唱），男聲部份係張匡佑Jason, 女聲部份大家估唔估到係我呢！所以今次我同小肥雖然無緣俾大家睇到電影角色上嘅演出，但我哋兩個聲演左呢套戲，都算係呢套電影音樂上嘅「男女主角」啦哈哈！