薛凱琪村姑造型成潮流指標 為真人騷落田摘粟米

薛凱琪(Fiona)最近參與內地真人騷《完美的餐廳》,除了要打掃清潔、招呼客人外,還要親自採摘下廚的食材:「要我煮已經好驚訝架喇,點知住個度仲對住個農場,有家禽、農作物自給自足,煮咩都要落田摘。好在我向梁祖堯學整粟米羹,每次同客人推銷這款湯時,都會由摘粟米嗰一刻講起,烹調過程都係親力親為。而收鋪之後,工作人員都會問我有冇湯剩比佢地飲,證明我煮得唔錯!」
Fiona就話刮粟米粒比較辛苦,仲要被逼著「獨特」農村服開工:「下身條花花褲真係不得了,節目組呢條褲喺網購賣斷貨,可能大家睇完我地著之後,成為潮流指標,所以大批入貨吧!」
薛凱琪就話因為拍攝節目,學識珍惜食材,有剩都會煮埋比大家食唔做「大蹝鬼」,而落田拍攝當日天氣炎熱,不過回歸大自然令佢感覺舒服:「雖然我由細到大都喺城市生活,不過我都頗嚮往喺偏僻、山區過簡單生活,因為在我來講簡單就係快樂,所以參與《完美的餐廳》節目,雖然體力上比較辛苦,但都覺得很好開心,甚至有時覺得比留喺城市更快樂,所以係很好的體驗,此外又令我跟其他組員感情變得更深厚。」

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。