細細粒苦練得成果 國內綜藝節目奪周冠軍

細細粒(陳嘉佳)早前飛往北京參與央視綜藝節目《星光大道》錄影,與內地素人進行演藝PK。節目中,細細粒先後展現唱功、舞功、柔軟度及靈活度,雖然狀態不算太好,但由於表現可愛兼擅於掌握氣氛,結果與另一位內地精英齊齊成為周冠軍!搞笑的是,向來感情豐富的細細粒,當知道自己喜奪周冠軍後,先是露出難以置信及天然呆的表情長達一分鐘,直到站在旁邊的選手提醒,才「如夢初醒」,並一秒爆喊兼激動至口齒不清,令主持們十分意外。

其中被細細粒感動至雙眼通紅的女主持人,更大爆細細粒為了做好個SHOW,練歌練至通宵達旦,情景令人十分感動。
之前在另一個內地節目《喜劇之王》中,憑維肖維妙韓紅扮相在內地爭取了一定知名度的細細粒,這次PK賽再以韓紅LOOK亮相,並先後獻唱韓紅的《絨花》及《LET IT GO》。

之後細細粒再以「小鳳姐LOOK」及花裙LOOK獻唱《上海灘》、《紅日》、《Monica》、《人間》。除了唱得,接受過地獄式「舞訓」的細細粒亦大晒舞技,連跳「胡巴舞」、BEYONCE的《CRAZY IN LOVE》和海草舞;為了搶FO,細細粒更自稱似容祖兒,並大跳「電臀舞」,獲得全場如雷掌聲。

小寶事後接受訪問,坦言對於自己能夠獲得周冠軍難以置信,她笑謂:「雖然我真係好努力練咗好耐,但我因為又要講國語又要好短時間內換衫好緊張,加上個個都臥虎藏龍,所以我真心係冇諗過有獎攞。」問到為何如此激動喊至口齒不清,細細粒續說:「本身我份人都係淚腺發達嘅,不過今次我流嘅係真眼淚。

因為今次我同工作團隊付出咗好多努力,我哋除咗排練咗好多個鐘,又度咗好多嘢希望可以做得更好。所以對於努力獲得肯定,我哋台前幕後都好感動,個個喊到收唔到聲。」問到整個比賽中最難忘的環節,細細粒笑言是與內地高手「舞鬥」部分:「首先嗰個環節嘅現場氣氛好好啦,同埋你哋咪睇我肥嘟嘟,我又真係幾靈活架喎,拉筋同埋係咁轉圈都難唔倒我,評判都有讚我話我咁都仲保持到燦爛笑容好可愛,有機會係喺嗰個環節加分嘅!」

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。