胡楓超齡學生LOOK拍攝旅遊網站廣告

85歲的胡楓(修哥)乘早前《4個小生去旅行》節目掀起全城話題,被世界領先網上旅行社Expedia睇中,應邀跟「繁忙兒童」劉小華及鬼妹仔Maggie Cute,齊齊穿上校服,拍攝新一輯廣告。《3個小學生去旅行 – 功課篇》廣告一出,網民隨即大讚這個組合既有新鮮感又可愛。修哥一句:「如果啲功課好似Book機票酒店咁易就好喇。」,亦抵死過癮。Expedia乘勢推出全新的《3個小學生去旅行 – 考試篇》,3月6日繼續在各大電子平台吸LIKE。

三位「小學生」拍攝過程笑料百出
修哥行年八十五,小華和Maggie Cute則八歲上下,年紀相差十倍,拍攝前修哥如開籠雀,大哼懷舊金曲,但兩個「同學仔」就唔知佢唱乜鬼。正式拍攝《考試篇》時,修哥將薯圈套在手指上,吃得津津有味,誰料一叫「CUT」,修哥即刻將薯圈吐出來,原來因修哥重視健康,油炸嘢戒絕,難怪他依然咁精靈。

廣告中講到考試殺到埋身,而劉小華就掛住打機未溫書。工作人員就大爆,導演未叫ACTION,小華已經打機打到扭軚盤、忘哂形,係「真。打機」!兩位「繁忙兒童」等埋位時亦爭取時間玩衾棉胎,但本地薑劉小華和鬼妹仔Maggie Cute一中一西,港式衾棉胎剩得最少贏,但洋人相反,兩個就玩法爭論不休。

至於被攝製隊稱為「華哥」的劉小華,如華仔上身,連導演問佢嘢,佢都冇正正經經回答,而係扮哂劉德華招牌眼神、小動作回應,俾佢激死。

修哥最愛跟CREW去旅行蜜月旅行過大海
問到修哥最喜歡怎樣旅行方式,他不諱言:「梗係去拍嘢,跟攝製隊去啦!會幫我安排好所有行程嘛。」遠在土耳其、西班牙、葡萄牙、俄羅斯、愛沙尼亞、拉脫維亞、立陶宛都能找修哥的腳毛,如果不是因為拍攝,他是愛家宅男一名。最遠只去過加拿大和英國,都是為了探仔女。連結婚渡蜜月,都只係去澳門而已,五十年代乘「大船」過澳門,要三粒鐘。修哥則入住當時澳門數一數二的國際酒店。

修哥坐飛機去旅行的第一次獻了給台灣:「當時三十多歲,朋友接待去台灣。在啟德機場坐飛機,幾巴閉!」

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。