[K韓公社] 안녕—–2NE1

過去既2016年不停地聽到解散既消息….2NE1、4minute、Rainbow….好多當時獨當一面既女團,都敵不過「解散」既命運,亦令到好多粉絲心碎既一年,而最令小編上心既,係2NE1,好多回憶湧上心頭….

仲記得個時佢地同師兄BIG BANG合作個手機廣告個首「Lollipop」,第一次亮相見大家,個時我就對佢地好深刻,就慢慢留意佢地既作品,佢地既作風同其他女團係真係有好大分別,一睇一聽就知係佢地,辨識度好高!唔經唔覺就睇左佢地咁耐,直到終結…
2015年既頒獎禮,相信都令好多人好驚喜,好振奮!當2NE1緩緩地、一個一個咁升上舞台,完全合體個一刻,全場既歡呼聲係全晚最厲害既瞬間!唔同團體既粉絲個一刻都合體咗,無分你我地一齊為2NE1應援,真係好感動!亦成為小妹一個遺憾,我無去到現場,我只能對住個MON大叫兼落淚….真係好想再一次親身感受佢地既舞台!佢地唯一一次係香港既一場演唱會,仲記憶猶新…
2014年3月22日,當日突然得知有幸參與,即刻飛車趕到去!見到佢地既個刻激動,到而家都仲好清楚記得,佢地係後台、綵排時既認真、打鬧、玩耍、互相打氣、關心,佢地係真係好好感情,亦好愛佢地既團隊,成個TEAM好熱情!特別佢地既專屬DANCER TEAM HI-TECH,成班都好ENJOY,好享受舞台,玩到癲哂!每一刻都仲歷歷在目。大家都無諗過,會有呢個結局,應該話唔止我地…..

一首告別曲,為2NE1既歷史劃下左句點。一首歌又豈能道盡咁多年既不捨、一齊走過既路、經歷過既辛酸,由一出黎比人話「無樣」,到成為一代女團,呢一切既一切,唔知點解,眼淚又想落下…我唔敢講自己係唔係「BlackJack」(2NE1粉絲名稱),但佢地既歌曾經陪我撐過好多痛苦既時候…
最後,想同2NE1講一聲:「7年來多謝哂」….韓文既「안녕」除了「再見」,亦等如「你好」,期望有一日可以再同佢地講:「안녕(你好),2NE1!」

>>DARA拍攝MV時忍不住落淚 (*DARA ig)