​​雷晴雯行得返感激古生古太周慧敏

Photo (04)

日前藝人雷晴雯 (Winnie) 轉發其五年前與周慧敏在古巨基演唱會後台相遇的合照,並多謝她的「女神」對她接受治療的鼓勵,字裡行間感覺Winnie當日似乎都真係應該傷得唔嘢少。
​​

致電Winnie慰問兩句,先知原來當日佢工傷令脊椎嚴重受創,又輪椅又柺杖仲俾醫生判埋死刑,叫佢諗定下半世點樣同輪椅及柺杖共存亡,Winnie坦言當日真係嚇到佢萬念俱灰。見佢宜家行得走得,問多幾句先知原來佢嘅救命恩人係古巨基同Lorraine。

Photo (01)

雷晴雯日前轉發Facebook提示發文感謝偶像周慧敏,字裡行間感觸良多。

「其實當年真係好絕望,咁啱基仔果段時間又係受傷連上台都要坐住輪椅,點知過咗幾個月突然話開演唱會仲要勁歌熱舞,咪即刻膽粗粗咁打俾Lorraine求救囉!我同Lorraine其實完全唔熟,但果一通電話佢即刻就應承幫我。不過好老實,佢同基仔忙演唱會都忙到顛啦,加上之後亦無再連絡過,我其實有諗過佢應該已經忙到唔記得咗,未料七八個月之後嘅一個下午佢突然打俾我,話基仔個醫師當晚會到香港,而且仲已經幫我安排好晒見面同接受第一次治療,果份感激絕對係無法形容!」

Photo (03)

Winnie說當日醫師形容她只比基仔「差少少」,要醫得比基仔「耐少少」,但仍可以即時給她「寫包單」保證她必能扔掉柺杖重新靠自己站起來兼行得走得。她坦言醫師的承諾如同絕望中的曙光,故本想向基仔及Lorraine親自面謝,豈料因不用變「殘廢」這恩典和希望都來得太大太快,結果Winnie見到佢兩個時竟然只係識得大爆喊,把兩人嚇一大跳,場面感動又搞笑。

Photo (02)
2010年古巨基新舖開張Winnie仲健健康康幫基仔做義工搞開幕典禮,未料一年後竟遇意外險變「殘廢」,幸得基仔兩公婆介紹良醫先行得返,都可以話係好人有好報。​

問她當日因工受傷可需要與舊公司打官司,Winnie表示官司其實已經搞咗好幾年,現今仍有兩宗於司法程序當中,她亦不宜多說,只強調她絕對相信上帝及法律必會還她一個最合情理的公道。Winnie坦言要完全康復是不可能的事,漫長嘅治療之路如同「燒銀紙」,所以現今只專心咁加倍用心工作,努力賺錢,希望終有一日可以重新起舞。聽完實在忍不住真心想要揶揄她,都已傷成這樣仍想著要跳舞,難怪有人話,舞癡其實都係一個死症!

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。