電影主題曲《在一起》MV 秦沛姜文杰父子兵上陣 2.8億點擊

由姜文杰 (Benji)及其父親秦沛合演之國內公路電影《我的1000萬》於上周五(22日)上畫，Benji負責曲詞監之電影主題曲《在一起》MV則在上周四發佈，豈料上載不足24小時，QQ(騰訊)點擊率竟然高達令人難以置信的2.8億，同時間正在昆明做電影宣傳Benji得悉消息，真係嚇到O嘴，之後定過神來就忍唔住爆喊。

Benji表示：「嗰日mv發咗上網個零鐘，已經有十萬點擊率，我好愕然，已經要開香檳慶祝，到第二日食緊晚飯，製片開咗個騰訊app嘅網頁俾我睇，睇到2.8億呢個數字，我呆咗好耐，喊囉！結果我冇食到飯，因為隻手喺度震，連夾餸都夾唔到，我當然都有whatsapp阿爸同阿妹，阿爸係好開心。我希望呢首歌嘅曝光率多帶挈到票房好啲，令自己有更多工作。」

這部戲於去年在雲南取景拍攝，亦是Benji首次出任男主角，其實多年來他一直堅持靠自己，不想因父之名而獲取工作機會，至於今次為何破例父子合作，Benji說：「之前經理人提議話搵埋我老豆一齊拍，我係抗拒，直至我媽咪喺加拿大打俾我，話阿爸入咗行六十幾年，而家都七十歲，第日唔知有冇機會兩仔爺一齊拍戲，阿爸唔知幾時退休架喎，咁我諗諗下又係。我由細開始，阿爸喺香港同加拿大兩邊飛做嘢賺錢，我喺加拿大長大，好少同阿爸見面，尤其入行呢十幾年都冇好好哋同佢做過嘢，只係之前我同阿妹做《我不是明星》時，劇組偷偷哋叫咗阿爸做嘉賓，所以我覺得呢次會唔會係一個機會可以彌補父子相處嘅時間呢？所以我就接咗。」

片中Benji飾演一個專拍微電影的寸嘴導演，有次遇上一個肯投資1000萬給他開戲的投資人，條件係要Benji搵到投資者離家出走的女兒擔任女主角，而秦沛飾演投資者派去隨Benji搵女的監視者，兩人沿路經過無數爭拗，最後秦沛竟發現Benji是他失散30年的兒子，戲內戲外都果然係父子兵上陣。