Summer Pop香港夏日流行音樂節圓滿成功

IMG_ (15)

兩場「Summer Pop香港夏日流行音樂節 – 創意綻放」音樂會,昨晚(8月30日)在紅館圓滿成功,王菀之、側田、藍奕邦、羅力威、Robynn & Kendy和AGA等六個樂壇新一代唱作人同台演出,自彈自唱騷本領,穿梭設計成遊樂場的舞台載歌載舞。

IMG_ (2)

音樂會由白色西裝的羅力威「白馬王子look」打頭陣,自彈自唱廣東歌《雙子情歌》、國語歌《全職宅男》和《暗號》等歌曲,台下不少Fans高舉他名字的燈牌,他亦賣口乖多次講「我愛你哋」,抱恙的他說:「你哋唔使擔心,我好返好多,我會用僅有既氣力為你哋唱歌。」歌迷冧爆尖叫。

IMG_ (5)

緊接出場是完全不同風格的唱作人藍亦邦,他披上長褸憂怨地唱《你倫敦.我紐約》,然後除外套自彈自唱《熱帶魚》,還唱了一首他寫給別人的作品《青春頌》,期間走去瀡滑梯和玩氹氹轉,非常開心。

IMG_ (6)

之後終於到女孩子出場,青春活潑的Robynn & Kendy又玩結他又玩口琴和迷你木結他Ukulele邊彈邊唱,而且又唱又跳,雖然穿上裙子仍百厭地擒上鋼架唱歌。原來昨日(30日)是成員Robynn生日,拍檔Kendy即場與歌迷合唱生日歌祝賀,壽星女感動說:「人生無幾多機會喺紅館舞上表演時過生日,就算我係女仔都唔介意公開年齡,我今日29歲啦,2字頭最後一年終於可以喺紅館表演,好榮幸呀!」

IMG_ (8)

活潑的Robynn & Kendy表演後,新人AGA自彈自唱《Better Me》和《一》。

IMG_ (10)

然後穿上7吋高跟鞋的王菀之出場,她先唱《手望》和《小手術》兩首慢歌,然後邀請藍亦邦出場與她合唱阿邦作詞的《好時辰》,唱畢阿邦讚Ivana靚女,她老實不客氣甫士講「多謝」全場笑聲,送走阿邦再邀請與她合作十年的唱片監製馮翰銘(Alex)出場。甫出場,Ivana就笑說:「一見到你我就想除高踭鞋,跳跳紮,著住高踭鞋好唔靈活,我要唱啲好有energy既歌!」她演唱《柳暗花明》和《粒糖有毒》時,果然無視高踭鞋,在台上跳來跳去,觀眾就替她抹一把汗。

IMG_ (13)

音樂會尾聲側田壓軸出場,一口氣唱首本名曲《命硬》和國語歌《很想很想說再見》大騷唱功,然後他邀請羅力威出場合唱《三十日》。兩人坦言原本互不相識,因為這個騷而成為朋友,而且一見如故,側田說:「有一次我請咗佢嚟我屋企jam歌,玩得好開心好有火花,仲完成咗我哋第一首合作歌,希望快啲可以面世。我哋好多共通點,都係好唔識講說話,都係好鍾意好鍾意音樂,對住個琴就可以乜都唔理,搞到女朋友詐型,係咪?」台下Fans起哄,羅力威尷尬傻笑,側田立即打圓場說:「唔講呢啲,我哋講返合唱歌!」羅力威亦沒有介懷,兩人合唱完最尾一句還搞笑扮借位咀咀,非常搞笑。

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。