莊思敏浸冰水拍安全套廣告

新一代岡本安全套廣告代言人，今日終於揭盅──正是全亞洲首位岡本女王，莊思敏(Jacquelin)。

Jacquelin近日成為岡本0.03 Cool及岡本0.03冰薄安全套的女代言人，日前她已秘密拍攝廣告，當日Jacquelin以性感造型上陣搏到盡，既瞓浴缸美人出浴，又和拍檔趙勁皓（King）大玩老樹盤根親密火辣遊戲，嘆盡冰火二重奏的她笑言「今次拍廣告真係特別又難忘」。

Jacquelin今次以一個合理誠意價接拍岡本廣告，她說：「今次價錢唔係咁重要，做到呢個產品代言我好surpise，對自己係一個挑戰。岡本呢個品牌同做安全套代言人我都覺得ok，加上對上係何潤東，佢一向俾我感覺健康，俾人印象好好。以前可能呢啲產品大家比較敏感，依家大家都會接受，做到亞洲區第一個女代言人當初都係戰戰競競，始終香港人有好多唔同睇法，今次係挑戰自己應付呢啲產品嘅能力。」

「自己一向俾人嘅形象都唔係咩特別清純乖乖女，自己喺電影上亦經常挑戰利啲嘅角色，有時做吓惡人，幾期待出嚟嘅反應係點，但我對個團隊好有信心，因為成個團隊好專業，畫面同成件事出到嚟係靚。」

Jacquelin表示拍攝過程非常順利，廣告商亦憐香惜玉，在一些性感玩冰環節，都對Jacquelin照顧周到，「因為個廣告係凌晨三點開始拍，已經夜深，個人好虛，都凍，好彩個客幫我喺浴缸入面鋪好軟墊同埋保鮮紙，配合乾冰使用嘅出浴鏡頭，感覺先冇咁難受。」

此外，廣告中Jacquelin和King亦有親密鏡頭，例如街頭嬉戲，當King在酷熱下抹汗休息之際，佻皮的Jacquelin從後飛身熊抱，請食「波餅」加「凍柑」，把冰涼罐裝飲料直接印到King頸上，為對方消暑。現場所見，Jacquelin跳上King背項後就雙腿緊夾對方，King亦好有默契地用手托住Jacquelin一雙長腿。Jacquelin憶述：「我同阿King合作過好多次，大家比較熟唔會有咩尷尬情況，呢個shot要跳上佢個身上面，佢企側咗少少，我跳上去時佢想即刻逗住我但唔成功，差啲成個跌落地下。」最後兩人終於成功「結合」兼原地旋轉，表達溫馨浪漫感覺。