柳妍熙返四川放假充電 與家人遊山玩水

歌手柳妍熙Shay去年中推出了首張個人EP《Who’s Shay》後，一直忙到冇停手，最近終於得到公司批准放假兩星期，乖乖女的她第一時間飛返家鄉成都陪伴家人，一聚天倫之樂，並且順道一家人暢遊四川。

出身於四川成都的Shay，對家鄉優美風景特別情有獨鍾，難得今次獲批14天大假，她馬上孝順地陪家人到了四川宜賓的風景名勝區，亦都係當年電影《臥虎藏龍》的拍攝地「蜀南竹海」。

Shay開心說：「一路遊翡翠長廊，一路幻想著自己係周潤發演嘅李慕白，在樹林中穿梭，型到爆，哈哈！其實我都係發哥超級粉絲，我都試過行山想捕獲發哥，但次次都無緣，我好多行山朋友都捕獲過發哥，仲影晒合照畀我睇，羡慕到不得了。」

問到如果有機會拍電影會唔會想同發哥合作？她當即興奮的話：「當然想啦，希望有一天可以夢想成真啦！」

 

除了在「翡翠長廊」幻想自己是周潤發的「李慕白」，Shay更在母親節陪媽咪去了位於成都的熊貓基地，她好幸福且內疚的說：「呢兩年實在太忙，都無辦法同爹地媽咪出去旅行，媽咪好鍾意小動物，亦都好鍾意熊貓，所以就唸到帶她去探大熊貓了。去到先發現其實熊貓都好醒好厲害，佢哋真係知道點樣可以食到竹筍最鮮嫩的部分。見到佢哋係度玩，古靈精怪，好可愛。」

她並表示非常享受與家人相處的時光，呢次亦都同他們拍了很多合照留念，不過他們都好怕羞不習慣出鏡，所以暫時還是留作私人珍藏。粉絲們想見熙爸熙媽盧山真面目，要等下次機會喇。