《壹獄壹世界》「14巴港男」接力踎監 陳梓瑩「出冊」擦餐勁

改篇自高登神作三部曲最終回的壓軸勁片《壹獄壹世界‧高登闊少踎監日記》，由電影公司舉辦的「實況體驗踎監有錢派」之「流動水飯房」踎監大賽，第三位參賽者陳梓瑩今午正式坐滿7日宣佈出冊，成功贏取 $20,000元現金獎。曾體驗「踎監」的張建聲今日專程到旺角見證「迎送生涯」，送走陳梓瑩並接新參賽者─「14巴港男」趙詠明「入冊」。

成功減肥的張建聲現時體重已回落154磅，身材極fit，精神爽俐，他說：「呢排仲要再操fit啲，因為遲啲會拍一個要剝衫嘅減肥食品廣告。」

25歲的「14巴港男」趙詠明透露目前任職運輸業，特別向公司請假參賽，以挑戰「踎監」7日為目標，問他會否擔心被重提被女友當街掌摑14巴一事？他就說：「過咗去嘅嘢唔需要再提，而家已經2015年，嗰啲(被摑)已經2014年，講我唔會痛係咪先？你講我會笑添，你講就當欣賞我。我都預咗人哋講啲難聽說話，但大個啦，人要向前望，唔會原地踏步。」他承認已跟女友分手「年幾兩年」，「佢有佢生活，我有我生活。」將來揀女友會否選擇性格斯文不暴力？趙詠明說：「啱咪去進取，唔一定要拍拖，屋企第一，第二工作，第三朋友兄弟，愛情對我嚟講可有可無，搵另一半係一世，唔係玩玩吓。」

今次參賽，趙詠明揚言不擔心被人指指點點：「冇問題，仲開心添。玩呢個遊戲個個都問我係咪因為錢嘅問題，我唔可以講個個生出嚟都係貪錢，我玩呢個遊戲唔係志在錢，係屋企人同埋自己，同埋俾自己諗吓嘢。」其孖生兄長曾經犯事入獄，趙詠明稱兄長已獲釋，他指每個人都有做錯，但做錯不代表一世都錯。

至於成功挑戰踎監7日的陳梓瑩贏得$20,000獎金，她「出冊」後第一件事會擦餐勁，「雪糕一定要，食雲南米線、油渣麵或者撈撈麵，我仲應承請10個朋友睇《壹獄壹世界》，又約屋企人食buffet。我呢7日係咁飲水同食飯，我數過，呢7日排毒排咗10次，都好健康，其實呢7日平靜過咗，最難捱係去廁所有保安陪住，有時尷尬，其次係要搵嘢打發時間。我最大感動係呢個活動好成功，吸引街嘅觀眾睇，喺屋企嘅又對住cam望到我，街外同街內都注意呢個活動，idea好成功。」