《壹獄壹世界》600港人為2萬獎金爭坐監

改篇自高登神作三部曲最終章的電影版《壹獄壹世界：高登闊少踎監日記》，已定於今個月28日正式上畫。片中主角之一的張建聲(Justin)身先事卒，於昨日(1日)打頭炮走入「流動水飯房」展開72小時踎監之旅，為電影一連串之宣傳活動掀起序幕。

今次電影出品方之一的中國3D數碼娛樂有限公司舉行這個長達超過一個月的實況體驗踎監遊戲，特別製作一部以「水飯房」為場境設定的流動囚車，內裏跟足水飯房設備，每日提供清淡三餐，參賽者不能帶任何通訊噐材亦無娛樂設施之餘，更會被全天候網上直播獄中生活；而張建聲在星期一(4日)期滿出冊後，會由勝出網上創意留言遊戲的參賽者接棒踎監，成功踎到3日獲獎 $8,000元港幣，踎足7日則獲 $20,000元港幣，正因獎吸引，因而成為網民熱話火速洗版，不少網友均指踎監一星期好搵過打工一個月，雖則「水飯房」不足一百呎，但面積猶勝劏房，所以報名反應相當熱烈，直至今日下午4時為止，電影公司官方 facebook 接獲報名坐監的人數已高達600人，引起全城坐監熱潮。

仍困在「流動水飯房」的Justin，至今午4時已踎監26粒鐘，今早他曾一度出現呆滯feel，對住直播cam自言自語：「個人係會困到癲，我都叫好啦，有啲嘢望吓，如果真嘅話，20個鐘頭已經黐咗線，崩咗潰。噚晚唔係好瞓到，今日好麻麻哋，實在難以形容。」

到下午同公司的莊思敏(Jacquelin)、唐貝詩(Lydia)和老闆蕭定一到場探監，Justin才識笑，回復奀皮本色，和莊思敏在囚車上齊齊踎任人拍，Justin仲呻到葉落，苦笑說：「好鬼辛苦，第一時間長，第二係好多街坊friendly，但周圍冇牆，好似瞓喺條街度好唔自然，最驚瞓覺，一紮醒瞓喺條街度，嚇到我吖，勁驚，我出返去會好好做人架啦。」

踎監的日子，Justin除了睇書打發時間外，還在車牆劃間，一劃代表一粒鐘；另外他又自製膠樽裝啞鈴做gym，同時又因適逢Jacquelin昨日(1日)牛一，所以助手特別買來生日cake，讓Justin為她補祝一下，但Jacquelin就戥Justin陰功：「一個人喺度係好無奈，比着我十五分鐘已經發癲，因為冇電話，現今呢個世代最難過就係冇電話。」