《壹獄壹世界》張建聲狂揪Ashina 王宗堯 Coffee 廁所gathering (附劇照)

改篇自小姓奴原創的高登神作三部曲之最終章《壹獄壹世界 高登闊少踎監日記》，已鐵定在今個暑假推出。男主角王宗堯和張建聲今次於片中齊為藝術犧牲，前者全裸，後者則谷肥60磅，但兩人每次戲中碰頭都火花四起，激情萬丈。

戲中王宗堯飾演風流富二代于日辰，一晚他誤中副車食錯另一有錢仔阿積(張建聲飾)的女友Ashina(郭奕芯)，二人因而積怨。全裸上陣的王宗堯跟着性感bra top的Ashina肉搏，之後為避打又要裸跑，全日只得一隻肉色襪仔包住重要部位。

對於這場全裸激戰，王宗堯說：「肉搏場面係鹽花，始終高登小說都有少甜，呢段戲係講于日辰嗰種人生嘅荒謬、目中無人、唔識死，直情喺人哋嘅主人房入面搞人哋條女，情況非常混亂，因為想件事更好睇，畫面上面又唔可以太踩界，女仔方面因為有好多限制，同埋始終新人，Ashina係冇做任何裸露動作，好自然呢啲就交俾我，但肉搏唔係戲肉，係醒咗之後，佢俾Justin打，迫供搵我出嚟，好彩當時我唔係完全全裸，都有隻襪仔笠住，但因為現場有個搖臂嘅鏡頭，要全裸又要就鏡頭又要縮嘅時候，曾經因為起身避開個搖臂，背脊刮到爆缸，都幾危險。」

Ashina對住剝光豬的王宗堯亦不尷尬，「佢好專業，加上大家有做安全措施，唔會好真係接觸到身體重要部分，所以過程都係開心。」

由於劇情講到酒醒後的張建聲驚覺女友被嗒嬲到癲，狂扯Ashina頭髮打鑊金兼將她撞地撞牆，真係睇見到痛，反而Ashina說：「拍係唔辛苦，只不過第一次有啲緊張，有一幕我俾張建聲推落地，膝頭哥撞落地板，喺咁爬嚟爬去，番屋企後見到個膝頭哥瘀咗。同埋我喺片場行落樓梯時唔覺意仆親拗柴，好彩係拍完嗰場打交先整親。」張建聲亦形容「打得勁」：「有一個鏡頭係推佢埋床邊，條腰骨屈到斷咁滯，又要推佢落地、推佢埋牆嗰幾吓驚架，始終個力猛，佢又第一次拍，好多位驚就唔到佢就傷架啦，但都ok，合作得幾好。」

此外，王宗堯和Coffee(林芊妤)都有大膽情慾戲，於靚廁內上演最激gathering，着七吋高跟鞋的Coffee要踎低單腳支撐身體，極其難度高。再去廁所gathering，Coffee則言無陰影：「都過咗一段時間，我已經完全拋低咗過去，因為我只係會記住開心嘅嘢，通常唔開心嘅嘢好快delete，至於場戲係套戲嘅一部分，拍出嚟成件事好合邏輯同埋好寫實。」她還大讚王宗堯係個好對手：「佢好好，都有幫我入戲，佢男神嚟架嘛，所以都拍得好開心。」