《導火新聞線》 王宗堯雨中濕吻楊淇 (附圖輯)

43

港視話題神劇《導火新聞線》今日正式播出,男神王宗堯(Greg)在劇中飾演記者樂嘉輝,性格不修邊幅又哩啡,滿臉鬚渣,又隊酒又鍾意周圍瞓。在港視發放的精華片段中,Greg盡展樂嘉輝烏were一面,在副老總梁小冰面前拉褲鍊,又在公司瞓覺揭起衫露晒點,而最吸睛的是他和楊淇雨中濕吻10秒的一幕,Greg在片中亦大讚好好睇:「呢場戲係我哋喺雨中好浪漫嘅深情擁吻之後,延伸我哋愛情發展嗰一刻,成個鏡頭拍攝非常好睇,雖然拍攝時候非常之辛苦。」

16

箍牙楊淇錫足10秒

據知王宗堯和楊淇拍這場戲係堅濕吻演出,王宗堯就說:「同小淇拍呢一段雨中濕吻嘅時候,嗰時佢啱啱矯正緊啲牙,戴住個小小透明牙箍,佢有少少擔心,但我覺得唔緊要,佢角色有呢個特質,可以keep住。其實呢場戲分前中後三part,由碼頭談情開始,大家有觸電感覺,跟住兩個人去咗馬路度,大家又經過一啲事,之後突然間落雨,有一吓大家都好似放開咗自己嘅束縛,開始喺雨度玩,玩玩吓互相有一吓對望。嗰一場戲我個角色係最有romantic感覺、最浪漫嘅一場戲,因為我個角色比較『哩啡』,睇勻成個劇本我係得呢場戲可以型仔,既然導演度咗落雨又要慢鏡嘅時候,我就喺呢場戲裏面叫到chok到盡。」

30

「王宗堯龍精虎猛,好勁!」

原來楊淇拍這場戲時病到飛起,但王宗堯抗體夠勁竟然冇事,「我拍時咁啱病得好勁,病咗個幾禮拜,擔心傳染俾宗堯,但拍完之後佢冇事,龍精虎猛,好勁!」她承認這場戲係濕吻,「其實都分唔清,全部撈埋一齊,兩個都係好投入嘅演員,好多時真係投放感情同投放愛落去….係濕吻嚟嘅!我哋覺得咁樣先係真實。同埋好好笑一樣嘢,就係喺雨中接吻矮啲嗰個通常係女仔,其實係會飲晒啲水,跟住我每拍一個take都好似飲咗啲水喺個口度,cut咗之後我就要螺番出嚟,咁我成日feel sorry,驚宗堯覺得其實我係咪唔好錫呢?但唔係,其實好好錫嘅,係嗰啖水令我唔敢飲落去,因為始終唔係乾淨水嘛。」

18

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。