鄭欣宜勁爆《你瘦夠了嗎？》MV 晒朝天一字馬

曾揚言不再減肥做自己的鄭欣宜(Joyce)，今日推出新歌《你瘦夠了嗎？》mv，這次她更親自邀請黃偉文(Wyman)填詞和陳奐仁(Hanjin)作曲這個重量級班底助陣，令新歌份量十足；難得的是Wyman和Hanjin極有義氣，日前更在百忙中抽空客串拍攝mv，特別是Wyman除了客串之外，還給予Joyce不少意見。

Joyce跟Wyman和Hanjin有個共通點，就是三人都不會減磅，《你瘦夠了嗎？》的歌名正好説明人不需在意肥瘦問題，最重要係活得開心，做回自己；Wyman為她度身訂造的歌詞，令Joyce對mv播出非常期待。

今次Joyce為了拍攝這個mv，專誠找排舞老師排舞，當中不乏難度動作，包括直立式「一字馬」，不要少看Joyce這個肥妹仔，她身手十分靈活，一如歌詞中所講「蚊跳到，象都可跳到」，連大笨象都可以跳舞；所以在拍mv當日，雖然Joyce由朝拍到晚兼又唱又跳，但她絲毫不累，表現專業，且更令現場充滿笑聲。

Joyce對於能跟Wyman和Hanjin兩位音樂大師合作，當然極之開心，她說：「拍呢個mv最開心係可以同我嘅夢幻組合一齊去做呢首歌，其實好多年前開始我已經好欣賞阿Y嘅歌詞，特別欣賞今次佢為我度身訂造嘅歌詞，覺得好適合我。好奇怪，其實我同阿Y之前根本冇咩機會傾過偈，但佢好似非常之了解我，我覺得由我哋三個唔會減肥嘅人去拍呢個mv，真係太perfect，加上佢哋兩個都能夠喺百忙之中抽時間客串拍mv，真係太開心，簡直令我嘅musi viedo升咗呢，所以希望大家會鍾意，今次真係花咗好多心機，無論係排舞同安排上等，如果去砌呢個完美組合，中間真係好有血有汗、有淚，非常之有heart，亦係我人生中認為最重要嘅project。我真係希望呢首歌可以power到唔同size嘅人士，表面上是好似係講肥瘦問題，其實係想講俾大家聽，好似阿Y喺歌詞中講『神佛滿天多分岔』咁，意思係世界上有各種各樣嘅人，每一個人都要有自己個人風格，俾人去欣賞嘅獨特氣質。」