王喜拍真人騷 16年後再扮消防員 (附圖輯)

IMG_ (11)

王喜主演的TVB經典電視劇《烈火雄心》系列膾炙人口,其消防員角色已成個人標誌,至今亦獲不少內地製作商邀他繼續扮消防員,繼之前接演內地電視劇《火綫英雄》後,近月他又聯同台灣藝人李威、國內《快樂男聲》選手魏一寧等六猛男,一同拍攝江蘇衛視的12集明星消防體驗真人騷節目,竟也湊巧被命名為《火綫英雄》,節目將於今晚(10日)播出。王喜並先後去了青島、濟南、臨沂、泰山和長島五個城市的消防訓練基地,拍攝受訓狀況,雖然拍攝期撞正酷熱暑假,每日接受大量訓練消耗所有體能,更要24小時被「監視」,不過有百萬酬勞落袋,都算辛苦有價。

IMG_ (1)

當日王喜先去第一站青島,這個地點主要是基礎訓練,有如香港的八鄉消防局一樣,而他首要面對的,就是除了內褲和潤膚乳之外,不能帶任何私人物品過軍旅生活,然後每天接受殘酷訓練,「第一個環節要步操,一罰就一百下掌上壓,我哋六個藝人都非常勉強,但最後都撐到,都係極端、殘酷嘅訓練,冇乜嘢食,加上我又食素,所以基本上一餐飯裏面,我係食得最少嗰個。」

IMG_ (4)

有指拍真人騷相當虐待,兼且全無私隱,王喜說:「最大虐待係除咗廁所同埋浴室冇裝camera之外,所有其他location都有,睡房有3部大機,6部遙控cctv,24小時包括瞓覺、熄咗燈都照roll機,係長時間俾人監視住,基本上一言一談,瞓覺發出任何聲音都會錄到,呢個喺精神上好大壓力,雖然你知道自己冇嘢,但奇怪囉。24小時入面除咗入廁所嗰刻冇人睇到,明白錄低咗未必會剪出去,但控制室都有好多人睇住個『芒』,所以要扮好人嘅話,未必有咁嘅體力24小時扮足24小時好人,總會有啲時刻你原形畢露,通常原形畢露嘅既畫面,製作人員先會要。」

IMG_ (2)

今次王喜接《火綫英雄》再一次扮消防員,難免令他回憶起昔日拍《烈火雄心》系列的畫面,「係一定令我諗起16年前喺香港八鄉消防局拍《烈火雄心》,16年後我帶住呢副年老軀殼喺青島面對內地消防基礎訓練,必然有個對照,但除咗步操口號,香港係用英文、內地係用國語之外,其他嘅基礎、體能訓練、消防器材,或者技術訓練都大同小異,不過我喺湖北同青島見過消防坦克,係第一次見,嘩!」至於其他體能訓練就和香港差不多,「動不動跑幾百米、然後做幾百下掌上壓,日日都係咁,啲衫由朝濕到晚,都未試過乾。事實上體能同1998年嘅我有一截距離,加上其他藝人全部都係80、90後,瞓喺我隔離床嘅魏一寧,講緊係廿歲出頭,唔知係91定92年出世,所以節目拍到中段嘅時候,佢都嗌我做『喜爸』….唉,真係冇辦法。不過好彩爛船都有三斤釘,都可以陪佢哋捱到尾,雖然兩個膝頭哥最後有啲事,但都捱到尾,冇丟香港臉啩?」

IMG_ (10)

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。