楊千嬅演唱會反應熱烈 加開1月28日

楊千嬅昨日親自執導,拉埋歌迷、助手和工作人員拍攝精彩短片,宣布明年個唱信用咭優先訂票反應熱烈,現加開1月28日一場! 為慶祝千嬅加入樂壇20周年大日子,早前宣布明年1月24至27日,假紅館舉行六褔珠寶呈獻「楊千嬅Les’t Begin 2015世界巡迴演唱會」,11月10日至14日期間東亞銀行信用卡優先訂票,門票售價$680/$380/$250,優先訂票開售反應熱烈,立即宣布加開1月28日,第五場,明日(12號)東亞信用咭專享優先訂票。

未知是否拍攝新片《單身男女2》時見得多大導演杜琪峯,從他身上偷師? 當千嬅聽到加場好消息後,立即化身「楊大導」,急急拉助手、化妝髮型師、歌迷和唱片公司及經理人部門等同事埋位,並指揮鏡頭擺位又諗台詞,拍攝15秒短片宣布好消息。首先鏡頭拍攝街邊一條長長的人龍,然後「龍頭」千嬅手舞足蹈,興奮地說:「睇到呢個場面梗係要加場啦!加開1月28日一場,13號有得訂啦!希望老闆除咗幫我加場,仲加埋同事人工!哈哈哈哈~」千嬅宣傳個唱亦不忘為同事謀福利,咁識做,難怪同事們都願意為她粉墨登場充常短片臨記!

相隔四年再踏紅館舉行演唱會,千嬅揚言心情既興奮又緊張,不過歌迷熱情的反應可減壓,她說:「信用咭客戶優先訂票反應咁熱烈,我好開心,相隔四年再開演唱會,的確有無比壓力,但呢個消息畀我好多能量。」又說:「呢個騷大家都期待咗好耐,最開心既事係一班陪伴成長既合作伙伴,今次再開演唱會對於大家意義好大,情緒高漲既團隊,好開心,值得同大家分享,亦希望大家同我分享。因為這個世上『好不容易遇見愛』,每一個相遇既人都有緣份,呢20年同我緣份既人都嚟到我呢個演唱會Let’s Begin!」她笑指老公丁子高最近化身售票網:「我好怕幫人訂飛,怕亂又繁複,但佢好樂意喎! 而囝囝(Torres)年紀太細未知發生咩事,但今次開騷其實有少少為咗佢,我希望佢將來睇返知道媽咪做咩?!」

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。