新公司落足本錢為加盟造勢 Janice Man：會努力做好自己作回報 (附圖輯)

Janice Man (文詠珊)與舊老闆黎明所屬的經理人公司約滿，結束五年賓主關係，Janice 簽約的新公司，下周會為她舉行盛大加盟記者會，並揼本拍攝廣告片、刊登大型廣告牌、在巴士車身賣廣告等等。

即將牽開人生新一頁，Janice充滿期待，她說：「我知道大家關心我o既新動向，但容許我暫時仍然要賣個關子，因為下星期會舉行記者會，到時會正式公布，我唔清楚成件要駛幾多錢，只知道新公司好鍚我，我好感激。」至於加盟的身價，Janice說：「幾多錢就唔好講啦，呢啲係商業秘密，哈哈，總之係開心價啦。」

現年25歲的J M年紀輕輕已榮升做老闆娘，自組公司「J M workshop」，準備在娛樂圈大展拳腳，她說：「因為我早出道，不經不覺入咗行已經十年，希望事業上可以有啲突破，新公司畀好大自由度我，我可以自己搵班底組公司，o係選擇工作上我亦有自主權，呢樣嘢對於藝人嚟講係好重要亦都好難得，所以我一定會珍惜，努力做好自己，報答公司。」

為配合新動向的宣布，Janice早前拍攝了一些宣傳照，構思和造型她都全程參與，問到加盟新公司後有何搞作，她說：「公司會盡量幫我爭取多啲電影拍攝機會，演出有發揮既角色，甚至有可能度身訂造劇本畀我，但要等落實之後先講得。我自己就想趁住候生，咩都嘗試吓，我覺得自己各方面都有好多進步空間，希望大家畀多啲機會我。」

Janice 透露現時自己感情方面暫時一片空白，她也不心急找男友，她笑說：「呢排搞公司o既嘢忙到死，邊有時間識男仔呀！而且o依家係我o既衝刺期，對於我嚟講事業先係最重要，我想搵多啲錢先，感情o既野唔諗住，順期自然啦。」