43吋長腿周美欣拍MV餵飽蚊(附圖輯)

擁有43吋長腿的周美欣(Lori)最近為新歌《後知後覺》拍MV,玉腿慘成為蚊子大餐,可憐她還要對住鏡頭扮作陶醉,情深款款唱歌,導演一嗌CUT機,工作人員立即替她噴蚊怕水和藥膏,事後她笑言這首歌MV有血有汗!

 

《後知後覺》是Lori第二首派台作品,由新加坡作曲人陳台證和填詞人徐繼宗合力創作,Lori說:「歌詞故事講一個女仔後知後覺發現知己男伴喜歡自己,當對方漸漸疏遠自己既時候,才發現自己已經都鍾意對方。」現實生活中她卻沒有遇過相同事情,她哈哈大笑自爆對感情事非常遲鈍,說:「人哋話女仔對愛情特別有第六感,好容易就feel到男仔對自己有好感,但我偏偏呢方面好遲鈍,我可能比歌詞中女主角更差,或者到個男仔走咗都未知道發生咩事!曾經試過有個男仔追緊我,原來都追得幾明顯,但我懵盛盛以為佢對我咁好係因為性格熱情,最後呢個男仔以為我拒絕佢,其他朋友就替我心急,畀我激到紥紥跳!」Lori坦言不感到可惜,她說:「我相信真命天子出現我一定會感覺到,唔使心急,依家工作至上。」

 

拍MV攝當日,Lori分別在睡房和郊外拍攝,由於取景的睡房不夠100呎,十幾人在小房內拍攝,眾人都滿頭大汗,Lori笑說:「難為十幾位猛男工作人員逼埋一齊,為咗讓出空間畀我喺睡上碌嚟碌去,鏡頭後全是汗水!」之後轉戰到沙灘和郊外拍攝,在沙灘上Lori最開心,她說:「陽光與海灘令我諗起今個夏天為操fit啲身型成日滑水和戈獨木舟,好似讀書嗰陣放暑假咁!」不過之後眾人移師郊外,她要躺在草地上拍攝時,其43吋長腿成為蚊子的自助餐樂園,她說:「雖然噴咗蚊怕水,但可能啲蚊太餓,所以我成為佢哋既大餐,最難受係忍住痕癢扮無事對鏡頭唱歌,工作人員好好,一cut機就立即畀藥膏我,今次拍MV真係有血有汗架!」